„Јас сум твојата вистинска мајка“ - Клишеа од латиноамериканските сапуници со кои израснавме

По 200 епизоди чекате да се открие некоја голема семејна тајна и сиромашната девојка да стане богата, па да нема пречки да се омажи за саканиот... Кои беа најголемите клишеа во латиноамериканските ТВ сапуници кои со месеци нѐ држеа „залепени“ пред ТВ екраните?

Колку од вас се сеќаваат на латиноамериканските ТВ сапуници со кои израснавме? Иако речиси сите имаа слична приказна, сепак не „се одлепувавме“ од малите екрани и ги голтавме приказните, кои најчесто се повторуваа.

Направени по сличен терк, речиси сите приказни се базираа врз стереотипи и клишеа. „Касандра“, „Есмералда“, „Руби“, „За твојата љубов“... ова се само некои од хит сериите што се емитуваа на македонските телевизии, а од денешна перспектива ви се чини дека ако сте изгледале една, тогаш сте ги виделе сите.

Да се присетиме на некои од клучните клишеа од латиноамериканските сапуници, со кои израснавме:

Секогаш главна тема се разликите во различните општествени слоеви, па затоа:

Некоја убава, но сиромашна девојка (која е во главната улога) почнува ново поглавје во нејзиниот живот, па сретнува и веднаш се вљубува во некое згодно богато момче (кое е во главна улога).

На почетокот главните ликови не сакаат да започнат врска, затоа што знаат дека нивната љубов е невозможна заради тоа што доаѓаат од различни слоеви во општеството.

Љубовни триаголници

Речиси секогаш има по уште едно богато момче кое се вљубува во сиромашната девојка, па тоа прави сѐ, и не бира средства и начин за да ја добие девојката, но и да ја попречи љубовната приказна со другиот главен лик.

Но, не е само богатото момче. Најчесто има и по некоја друга сиромашна и скромна девојка, или слугинка која е потајно вљубена во главниот машки лик. Па и таа од друга страна прави сѐ за да ѝ наштети на хероината во приказната.

Во 200 епизоди чекате да се разоткрие некоја голема семејна тајна

„Јас сум твојата вистинска мајка...“

Речиси секогаш, од самиот почеток како гледачи ја дознававме големата тајна што некој од главните ликови ја крие и чекавме по 200 епизоди за да се разоткрие.

Сценариото ве држи како „на јадица“ и таман ќе помислите дека нешто ќе се случи и тајната ќе се дознае, пак почнува нов заплет и сѐ така од пролет до зима...

Сиромашната девојка секогаш станува богата на крај

Често се случува семејната тајна да е поврзана со идентитетот на девојката која ја има главната улога, па наместо сиромашна селанка, на крај да се дознае дека е богата наследничка...

И, ете, веќе нема пречки за љубовта да се оствари.

Секогаш свекрвите и слугинките се злобни

Свекрвите или мајките на главниот јунак речиси секогаш се надмени, богати жени кои се згрозени од помислата нивниот син да биде во врска со сиромашна девојка, па најчесто тие се и главните противници на љубовната приказна, потпомогнати од љубоморните слугинки, што ги спомнавме претходно.

Секогаш некој е тешко повреден или умира

Најчесто ваквите несреќи се последици на битките во љубовните триаголници, а многу често се случува да настрада некој близок до главните ликови (од замките што им биле поставени ним).

Сѐ се решава во последните 5 минути од последната епизода

Откако ќе поминат низа перипетии и заплети главните јунаци, на крај остануваат заедно.

Секако, сите околу нив аплаудираат, а нам ни останува само да здивнеме, затоа што сме завршиле уште една маратонска серија.

Б. С. Б. | Црнобело