Празен паркинг и уште 6 знаци дека е подобро да го напуштите хотелот, според вработени

Прегорените сијалици и прашината во лобито се само дел од ситниците што покажуваат дека можеби треба да најдете друг хотел, доколку е возможно.

Кога закажувате хотел онлајн или по телефон, не можете да бидете сигурни што ќе ве дочека, без разлика што на веб-сајтот сигурно има фотографии.

Но, кога ќе пристигнете, можете веднаш да воочите дали хотелот е (релативно) добар ако обрнете внимание на некои работи.

А, важно е да бидете свесни за овие работи и ако барате хотел на самото место.

Вработени во хотел откриваат на што треба да обрнете внимание:

Празен паркинг

Ако паркингот на хотелот е празен, тоа може да значи дека не е популарна локација.

Нормано, треба да ја имате предвид и сезоната и тоа дали го посетувате местото во атрактивен период.

Но, генерално, не е добар знак ако паркингот е речиси празен.

Нема колички за багаж и никој не се нуди да ви помогне

Гостопримството е една од најважните работи за хотелите.

Па, треба да им понудат помош на гостите кога доаѓаат.

Ако не гледате колички за багаж или вработен кој им помага на гостите, тогаш не очекувајте многу добар третман во хотелот.

Прегорени сијалици

Секогаш може да се случи да прегори некоја сијалица, но ако го забележите ова на повеќе места низ ходниците или лобито на хотелот, веројатно не се обрнува многу внимание на одржувањето на хотелот.

Ова значи дека во собата може да ве пречека нешто неисправно, па и скршено.

Пред да тргнете на патување, не добивате брзи одговори од хотелот

Пред да закажете соба, нормално е да имате прашања.

Ако не добивате брзи одговори, ова може да биде предупредувачки знак бидејќи покажува дека на вработените не им е многу грижа за гостите.

Прашина и нечист влез

Ако уште на влезот и лобито на хотелот забележите прашина и нечистотии, тоа е знак дека не се води многу грижа за хигиената.

Влезот и лобито се најпрометните делови во хотелот, па ако не се исчистени тие, веројатно не се чистат ни другите.

Не ви бараат документ за идентификација кога ќе пристигнете

Рецепционерите мора да ви побараат документ за идентификација од безбедносни причини.

Доколку не го прават тоа, значи не се грижат многу за безбедноста во хотелот.

Како е наместен креветот

Креветот е првото нешто што „паѓа во очи“ кога влегувате во собата, па очигледно е зошто треба да биде среден беспрекорно.

Ако креветот не е наместен како што треба, тоа може да значи дека хигиеничарите не обрнале многу внимание на остатокот од собата.

Спирова С. | Црнобело