Родила 2 деца од мажот што ја киднапирал, ја нашле по 18 години: „Украдениот живот“ на Џејси Дугард

Цели 18 години, Џејси Дугард од САД ги поминала во заробеништво – била чувана во шупа, а потоа во шатор во дворот на брачен пар. Џејси билa и жртва на силување, поради што родила две ќерки. По спасувањето, Џејси пробува да живее нормален живот, но го крие идентитетот на ќерките.

Со денешните ресурси и технологија, полесно е да се лоцираат исчезнати деца и надлежните успеваат да ги пронајдат повеќето уште во првите 24 часа.

Сепак, како што минува времето, се намалува и можноста да се најде детето, особено ако било киднапирано.

Но, постојат и ретки случаи кога киднапираната личност е најдена и по неколку години, како тинејџерот од САД кој беше пронајден во февруари 2025, 7 години по неговото киднапирање.

Има и пофасцинантни случаи, кога киднапираното дете е пронајдено и многу години подоцна – на пример, скоро две децении.

Случајот со Џејси Дугард спаѓа во оваа категорија.

Џејси била киднапирана во 1991-ва, на 11-годишна возраст, а била спасена цели 18 години подоцна, односно во 2009-та.

Овие години во заробеништво биле далеку од лесни за неа, но денес таа го дава најдоброто од себе за да има исполнет живот.

За својата голгота има напишано книга – A Stolen Life (украден живот) – честопати гостува во емисии, а има основано и фондација преку која им помага на семејства да надминат кризни моменти во животот.

Што ѝ се случило на Џејси и како била пронајдена?

Џејси била родена во 1980 година. Нејзините родители не биле во брак и имале само кратка љубовна врска кога мајка ѝ останала бремена.

Па, Џејси пораснала само со мајка си.

Кога наполнила седум години, мајка ѝ се венчала и добила уште едно дете со новиот сопруг.

Откако пристигнал новиот член во семејството, тие се преселиле од Лос Анџелес на помирно место бидејќи мајка ѝ сакала да пораснат во природа.

„Имаше планини, воздухот беше чист и градот беше мал – мислевме дека е безбедно место.

Преселбата во малиот град ни делуваше како ослободување. И, Џејси беше пресреќна“, има изјавено мајка ѝ.

Но, неполна година откако се преселиле, на 10-ти јуни 1991-ва, Џејси била киднапирана додека одела кон автобуска постојка, и тоа додека било ден.

Киднаперите биле Филип Гаридо, кој бил сексуален престапник, и неговата сопруга Ненси.

Според изјавите на очевидците, тие поминале покрај постојката во автомобил.

Филип возел, додека Ненси ја грабнала Џејси и присилно ја ставила во автомобилот.

Меѓу сведоците бил и очувот на Џејси, како и нејзини соученици кои стоеле на постојката.

Очувот Карл почнал да трча кон автомобилот, но бидејќи бил не можел да го стигне, веднаш влегол во домот на сосед и повикал полиција.

Откако беше најдена, Џејси откри дека ги молела Филип и Ненси да ја вратат дома, дека нејзините родители немале пари ако бараат откуп.

Но, тие ја однеле во нивниот дом и ја затвориле во шупа.

Во своите мемоари, Џејси открива дека ја држеле врзана со лисици и без облека, а Филип многупати ја силувал.

Продолжува на следната страница...