Патување со крузер како од хорор-филм: 4.000 патници поминале 4 дена на море, без храна и функционални тоалети

Поради расипаната канализација, се јавила сериозна закана од секакви зарази, но и престојот во бродот веќе бил невозможен.

Па, патниците се сместиле на палубата, за да го зачуваат здравјето, но и да се спасат од ужасниот мирис.

Четири дена откако бродот останал без струја, значително се намалиле и залихите на храна. Проблемот бил влошен бидејќи фрижидерите не работеле, па многу намирници се расипале.

Иако јаделе само колку да преживеат, повеќето патници се сложни дека најлошо нешто била ситуацијата со тоалетите.

„Навистина, најлошо беше одењето во тоалет. Користевме мали вреќи кои ги стававме во корпите за ѓубре. Но, и храната беше ужасна, можеби најлоши беа ладните сендвичи со кромид“.

Од копно се правел план за спасување, но неговото изведување не било така лесно. Најпрво, без можност да биде контролиран, бродот веќе одлутал кон отворено море и бил на околу 240 километри од брегот.

Спасувањето со хеликоптер било преризично бидејќи имало 4.000 патници, а исто ризично било и спасувањето со чамци поради оддалеченоста на бродот од копно.

Најбезбедна опција за сите патници била бродот да се извлече до најблискиот брег, но на бродовите кои се доволно моќни да влечат крузери им требале неколку дена да стигнат до Мексиканскиот Залив.

Па, неколку денови патниците и вработените биле оставени сами на себе и единствена опција им била да чекаат.

Конечно, помошта пристигнала на 14-ти февруари, односно четири дена по пожарот (и осум дена од почетокот на патувањето).

Бродот бил извлечен до најблиското пристаниште, а следниот ден бил организиран автобуски превоз за патниците да можат да се вратат дома.

Неодамна на Нетфликс почна да се прикажува документарец за трагедијата, а по тој повод се огласија раководителите на крузерот. Случајот е опфатен во серијалот Trainwreck кој се емитуваше на 24-ти јуни.

„Инцидентот од пред 12 години беше голема лекција за целата индустрија. Деталната истрага по инцидентот откри пропусти во дизајнот кои беа поправени, а нашата компанија инвестира над 500 милиони долари во сите свои бродови.

Сега имаме нови системи за спречување и придушување пожар, подобрени системи за менаџирање, сето како одраз на високите стандарди за безбедност што ги почитуваме.

Горди сме на фактот дека од 2013 година, над 53 милиони гости уживале во безбедни и незаборавни одмори на нашите крузери“.

Спирова С. | Црнобело