„Дознав дека маж ми е педофил – ми се гади од пораките што ги праќал до девојчиња, во затвор е за силување“

„Ми се јави сопругот и ми кажа дека го испрашувале во полиција. Бил под истрага за праќање непристојни пораки на тинејџерка, но ми рече дека бил невин. Му поверував, но наскоро дознав дека обвиненијата се вистинити и дека најлошото допрва следи“.

Лорен Треван од Австралија сметала дека има релативно добар живот – била во брак со личност што ја сака, а со сопругот имале и дете.

Но, по 15 години заедно, ја открила мрачната тајна на сопругот – тој бил педофил кој не само што се допишувал со девојчиња, туку сега е обвинет и за силување.

„Кога заѕвони телефонот, не бев свесна дека она што ќе се случи следно ќе ми го сруши светот. Ми ѕвонеше сопругот, Кип Волфорд, за да ми каже дека го испрашувале во полиција.

Инсистираше дека е недоразбирање и ми објасни дека бил под истрага за праќање непристојни пораки на тинејџерка што ја сретнал во спортски клуб.

Шокирана, му поверував, но наскоро дознав дека обвиненијата се вистинити и дека најлошото допрва следи“, раскажува 46-годишната Лорен за The Sun.

Лорен и Кип се запознале кога таа имала 19, а тој 28 години.

Вели дека бил харизматична личност, па кога ја поканил на состанок, била пресреќна.

„Додека јас бев на обука за медицинска сестра и бев во лоша финансиска состојба, тој имаше свој дом и добра работа во банка.

Ми покажуваше многу љубов, ме носеше на одмори и ме опсипуваше со подароци и комплименти“.

Лорен вели дека се вљубила во него и по некое време почнале да живеат заедно.

Но, само една година подоцна, однесувањето на Кип се променило. Имал гневни испади, а со текот на времето како да пробувал да ја контролира.

„Ме критикуваше и за ситници, на пример ако купам маргарин од друг бренд. Помеѓу ваквите епизоди, се однесуваше нормално, па кога ме побара за жена на мојот 25-ти роденден, прифатив“.

Лорен и Кип се венчале во 2005-та, а до 2012-та добиле син и ќерка.

Како што минувале годините, Кит сè повеќе се дистанцирал од Лорен, а истовремено пробувал и да ја контролира.

„Кога бевме дома сами, беше добар со децата, но постојано правеше да се чувствувам како да не сум доволно добра за него. Пред нашите пријатели се шегуваше дека бракот и децата му го уништиле животот“.

Поттикната од своите блиски, во 2015 година Лорен посакала да го остави. Но, тој ветил дека ќе се промени, па таа му дала уште една шанса.

Само два месеца подоцна, Лорен го добила повикот во кој Кип ѝ кажува дека е под истрага за комуницирање со малолетничка.

„Си реков дека сигурно не е вистина бидејќи никогаш не покажал знак дека го интересираат млади девојки“.

Кип наводно ја запознал девојката во локален спортски клуб. Па, три дена по испрашувањето, одборот на клубот свикал состанок и ги поканил Лорен и Кип.

„Претпоставив дека ќе се разјасни целата ситуација. Но, наместо тоа, ни кажаа дека родителите на девојчето им ги испратиле пораките што ѝ ги пишувал сопругот.

Кога ги прочитав, ќе повратев. Кип ѝ пишувал доцна навечер, ѝ кажувал како сакал да биде со неа и како сакал да го масира“.

Лора вели дека од пораките било јасно дека на девојчето му е непријатно. Пробувала да го заврши разговорот, но тој продолжил да ѝ пишува.

Лорен само излегла од состанокот и Кип тргнал по неа. Но, таа му рекла да не се враќа дома штом е педофил.

Кип ѝ пишувал пораки кажувајќи дека е невин, па на крај му го блокирала бројот.

„Беше тешко да им кажам на нашите деца, тогаш на возраст од три и шест години, дека татко им направил нешто лошо и веќе нема да живее со нас. Беа тажни и збунети“.

Неколку денови подоцна, Лорен добила повик од маж кој ѝ рекол дека знаел што направил Кип и дека ќе го убие.

Исплашена, Лорен со децата заминала кај нејзините родители.

„Но, кошмарот само што почнуваше. Во наредните неколку недели, уште шест жртви го обвинија Кип не само за непристојни пораки, туку и за сексуален напад“.

На крај, Кип се соочил со повеќе од 20 обвиненија, вклучувајќи и за силување и односи со лице помало од 16 години.

Неговите жртви биле на возраст од 11 до 17 години, а според едно обвинение, Кип силувал девојче и во домот каде што живеел со Лорен и децата.

„Ми се кршеше срцето кога мислев колку исплашено и само се чувствувале тие девојчиња. Не се сомневав во нивните приказни.

Ми се гадеше од помислата дека спиев во ист кревет со него и се прашував дали се венчал со мене за да си ја заштити репутацијата како посветен сопруг и татко“.

Судењето на Кип започнало во 2017 година, а тој се изјаснил како невин.

Сепак, на крај бил прогласен за виновен за 21 обвинение, вклучувајќи и силување и односи со личност помала од 16 години.

Кип добил 14 години зад решетки.

Оттогаш, Лорен и децата се преселиле во друга држава, а таа почнала да учи криминологија.

Почнала да волонтира во центар за жртви на семејно насилство, а вели дека дури сега престанала да се обвинува за злосторствата на поранешниот сопруг.

Нејзините деца денес имаат 16 и 13 години и Лорен вели дека уште не ги знаат сите детали за злосторствата на татко им.

Тие не го посетуваат во затвор, а кога ќе наполнат 18 години, ќе можат самите да одлучат дали ќе сакаат да го видат.

Лорен додава и дека има нов партнер кој ѝ помогнал да се справи со целата ситуација.

Спирова С. | Црнобело