Како тоа балерините никогаш немаат вртоглавици?

Благодарение на промената на структурата во мозокот, како последица на долгогодишното вежбање, балерините можат да изведуваат пируети во непрекината низа, а да не им се заврти во главата.

Заради честото вртење, во мозокот на класичните балерини доаѓа до промена која ги поништува сите сигнали кои го предизвикуваат вртењето во главата, односно во внатрешното уво, се наведува во најновото проучување.

Кај поголем дел од луѓето брзото вртење предизвикува вртоглавица, заради флуидите кои го исполнуваат внатрешното уво кои продолжуваат да се вртат и по престанокот на физичкото поместување, речиси идентично како кафето по мешањето со лажичка.

Во истражувањето спроведено на оваа тематика и проучувањето на овој феномен, учествувале 29 класични балерини и 20 млади жени кои тренирале веслање.

За време на тестот, секоја од нив се вртела во ротирачка столица, во потполна темница. Истражувачите пратејки ги рефлексите и проучувајќи го мозокот дошле до заклучок дека симптомите кај балерините траат многу пократко (околу 1-2 секунди) отколку кај другите девојки кои тренирале веслање.

„Затоа што на класичните балерини не им е "дозволено" да почувствуваат вртоглавица или губење на рамнотежата, мозокот по извесно време станува отпорен на вртењето и ротацијата на телото така што сигналите кои ги прима речиси ги игнорира. Затоа и балерините важат како единствената група која е отпорна на вртоглавици,“ објасниле научниците.