Рок на употреба: Разликата помеѓу ознаките „употребливо до...“ и „најдобро употребливо до...“

Голем број на потрошувачи ширум светот не се свесни за разликата помеѓу ознаките „употребливо до...“ и „најдобро употребливо до...“ па заради оваа грешка поголемо количество на храна завршува во кантата за ѓубре.

Што значи „употребливо до...“ ?

Тоа ја означува датата до која храната може безбедно да се користи. По датумот означен на амбалажата, не смеете да ја консумирате храната.

Замрзнатото месо, замрзнатите месни преработки и замрзнатите непреработени рибји производи задолжително треба да имаат „замрзнато“ пред овој датум.

Доколку ова зборче е изоставено, тие производи го прекршуваат правилникот и подобро би било да ги избегнувате.

Откако датумот ќе помине, задолжително фрлете ги овие намирници.

Што значи „најдобро употребливо до...“ ?

Со оваа ознака производителите го означуваат датумот до кога храната го задржува основниот квалитет, по кој и понатаму е безбедна за користење. Но, во овој случај амбалажата мора да е неоштетена, затоа што влагата и воздухот може значително да го променат рокот на истекување.

По датумот означен со најдобро употребливо до, храната го губи квалитетот односно вкусот и текстурата.

На овој начин најчесто се означени разладените, смрзнати и сушени производи, како и конзервираните намирници.

Откако датумот ќе помине, овие намирници може да се користат доколку се соодветно чувани и неотворени. Всушност, тоа е главната разлика.