Како да ги исчистите мрсните садови без хемикалии?

Тавите се незаменливи кога треба да испржитевкусни компирчиња или парче месо, но кога ќе дојде редот за миење, може да зажалите за вкусното јадење кое сте го подготвиле во нив.

Не посегнувајте по гумените ракавици и хемикалиите кои понекогаш прават повеќе штета, отколку корист. Послужете се со овие едноставни начини да ги исчистите тавите од старата, насобрана маснотија.

Прв начин

Излупете еден компир, исечете го на половина и едната половина натопете ја во сода бикарбона. Со таа половина тријте ја тавата исто како со сунѓерче. Треба да вложите поголем напор, но резултатот ќе биде веднаш видлив.

Втор начин

Маснотијата на тавата може да ја исчистите и со кесичка чај. Земете сува, неискористена кесичка чај и поминете ѕидовите на тавата полни со маснотија. Веднаш ќе забележите како маснотијата се раствора, односно впива во кесичката чај. Доволни ви се 2-3 кесички од било кој чај за тавите повторно да светнат.

Трет начин

Земете поголем сад во кој може да ја собере тавата или садот кој го чистите и во него ставете 4-5 лажици сода бикарбона. Прелијте со вода и варете ја течноста 30-50 минути, додека тавата која сакате да ја чистите е внатре. Потоа само пребришете.

За оваа метода не ви е потребен напор, но потребно ви е време. Најпогодна е за чистење цедилки, вилушки, лажици, капачиња од тенџериња и останати кујнски предмети кои се тешки за чистење со сунѓерче.