Тажната приказна зад белите велосипеди

Белите велосипеди, врзани со ланци за патокази и огради можат да се сретнат насекаде низ светот. Познати се како сенишни велосипеди и служат како мрачен потсетник на трагедијата која се случила на тоа место. Секој од овие бели велосипеди симболизира загинат велосипедист.

Повеќе од 200 градови низ светот се украсени со овие скромни, но срцепарателни споменици. Обоени со бел спреј, велосипедите дискретно се вклопуваат во градскиот пејсаж.

Групата која ги прави сенишните велосипеди е составена целосно од волонтери. Понекогаш, семејството и пријателите на жртвите помагаат да се направат и постават велосипедите во спомен на нивните сакани.

Секој велосипед се прави со една едноставна цел - да ги потсети учесниците во сообраќајот да забават, да возат безбедно и да ги третираат останатите со почит.

Поставувањето на овие споменици се врши многу незабележливо. Волонтерите го носат сенишниот велосипед до местото на фаталната несреќа, го заклучуваат за сообраќаен знак и тивко си заминуваат.

Овој проект започнал во 2003 година во Сеинт Луис, Мисури и од таму се раширил низ сите страни на светот.

Со 150 поставени сенишни велосипеди, Њујорк е најголемиот град кој учествува во овој проект. Веќе 10 години њујорчаните организираат меморијално возење во чест на загинатите сограѓани. Секоја година во април се собираат велосипедисти од сите сфери на животот и ги посетуваат местата каде минатата година велосипедисти го загубиле животот.

На местото на секоја несреќа, учесниците поставуваат цвеќиња врз сенишните велосипеди додека семејството и пријателите споделуваат сеќавања за жртвата: кои биле, како живееле и како умреле.

Потоа, сите ги подигаат своите велосипеди над главите во прекрасен но срцепарателен, тивок поздрав.

На крајот на овогодишното возење, учесниците поставиле сенишен велосипед пред зградата на градското собрание и ги прочитале имињата на сите 150 велосипедисти кои загинале откако почнал проектот со цел да потсетат дека напорите на власта не се доволни за да се заштитат велосипедистите во сообраќајот.