2-ри февруари е ден резервиран за палачинки

Секоја година датумот 2-ри февруари во Франција е резервиран за јадење палачинки. Денот се нарекува „La Chandeleur“ додека Французите се сладат со познатото тесто надополнето со вкусни додатоци.

Овој религиозен католички празник се паѓа точно 40 дена после Божиќ, но прославата со јадење палачинки влече корени од минатото, односно врзана е со предхристијански празник каде што се славела жетвата и се означувала средината на зимската сезона.

„La Chandeleur“ претставува мешавина од двете традиции, а резултатот е јадење вкусни палачинки. Кружната тркалезна форма на палачинката го симболизира сонцето и кругот на животот, додека самиот чин на јадење и споделување палачинки се поврзува со историската традиција каде што Папата им дава јадење на сиромашните секоја година токму на 2-ри февруари.

Локалното население објаснува дека овој ден се смета за еден од најсуеверните денови во Франција.

Сé зависи од тоа во кој дел на Франција се наоѓате. Некаде, жителите ставаат паричка врз палачинката додека ја печат за среќа, додека други веруваат дека треба да држите паричка во десната рака додека ја превртувате палачинката со левата рака. Доколку не ви падне ниту едно од двете, целата година ќе ви биде исполнета со благосостојба.

Едно од поинтересните суеверија врзани со Денот на палачинките е дека доколку врне дожд, тоа означува 40 плус дождливи денови во годината, додека мирно и сончево време значи дека зимата е веќе при крајот.

Интересна традиција, а ние можеме да го присвоиме само делот со јадење палачинки, зарем не? Поканете ги најблиските на палачинки со меурчиња кои се топат во устата и не заборавајте – Bon Appétit!

• 
• 
• 
• 
• 
• 
• 
• 
• 
• 
• 
• 
• 
• 
• 
•  

(О)Милена | Црнобело