Долги фустани на закачалка: Грешки заради кои облеката не ви трае долго

Сите сакаме плакарот со облека да ни биде совршено нареден и организиран и секако, да има место за сите работи без да се туткаат и уништуваат. 

Но, факт е дека немаме место за цела облека да ја закачиме на закачалка или пак да ни биде само на едно место преку цела година. 

Ретко кој облеката за сите сезони ја чува на едно место и не ја распределува според тековната сезона.

Кога сезоната ќе заврши, повеќето од нас ја ставаат таа облека настрана, одзади во плакарот, ја пакуваат во кеси, куфери или во други плакари – секој различно.

Но, дали знаете дека неправилното чување на облеката може да го уништи нејзиниот изглед и квалитет?

Дознајте кои се грешките кои треба да престанете да ги првите ако  сакате да ја зачувате облеката:

Несоодветна грижа за сезонската облека

Пред да ја соберете настрана сезонската облека, секогаш добро исперете ја или однесете ја на хемиско чистење.

Во спротивно, капутите може да избледат и да го изгубат нивниот оригинален изглед, а кожните работи да изгубат еластичност. Исто така секогаш заштитете ги од непосакувани инсекти.

Користите вакуум за секакви работи

Кесите со вакуум се многу практични, но за оригинална кожа и крзно овој начин на складирање е неприфатлив, бидејќи без пристап до воздух подолго време, тие може да добијат непријатен мирис, да се залепат доколку имаат додатоци и да се уништат.

Овој тип на пакување може да го користите кога одите на пат за да ви зафаќа помалку место во куферот. 

Погрешни закачалки

Никогаш не штедете на закачалки и никогаш не закачувајте повеќе парчиња на една иста закачалка, бидејќи така облеката не може да „дише“.

Друга важна работа е да изберете правилна големина за облеката, за да не се изгуби формата кај рамената и ракавите.

Не закачувајте тешки јакни и капути на тенки закачалки или пак облека од тенок материјал на стара и оштетена закачалка бидејќи може да се искине.

Неправилно чување на џемпери и трикотажа

Волнените и плетените џемпери не треба да ги закачувате на закачалки за да не се изгуби нивниот облик. Меката облека од осетлив материјал здиплете ја убаво и наредете ја на посебни полици.

Не ги претрупувајте полиците до горе и оставете простор помеѓу нив.

Долгите фустани ги закачувате на закачалка

Долгите фустани и здолништа кои се влечат до долу во плакарот не треба да ги закачувате на закачалка туку да ги префрлите преку шипката за закачување.

Така помалку ќе се тутка и нема да се оштети кај рамената или во долниот дел.

Неправилно чување фармерки

Најдобар начин за чување на фармерките е да ги закачите на закачалка на долниот дел и целосно да висат надолу. Ако ги закачите на закачалка преклопени на пола, може да се истуткаат или да се оштетат на средина каде што се закачени.

Преклопување на градниците на пола

Со преклопувањето на градниците на овој начин го уништувате обликот на градникот и градите во нив нема да ви изгледаат како што било замислено. Ставете ги едно врз друго без да ги виткате.

Незакопчани копчиња и патенти

Кога закачувате облека на закачалки, не заборавајте да ги закопчате патентите или копчињата. Така ќе стои постабилно на закачалките и нема да ја изгуби својата форма.  

М. М. | Црнобело