6 начини на кои мирисот влијае на нашата психа

Дали сте знаеле дека зајакот има 100 милиони рецептори за мирис, кучето 220 милиони, а човекот само 5-6 милиони.

Иако не се во толку голем број како кај овие животни, сепак сетилото за мирис на човекот е исто така доволно развиено за да може да има поголема контрола од тоа што замислуваме.

Па така, мирисот многу влијае на нашата психа, како и на расположението, па дури и на донесувањето одредени одлуки.

Погледнете неколку начини на кои мирисот влијае врз нас и што ни прави:

Го подобрува вкусот

Сетилото за вкус ни кажува дали храната е солена, горчлива, кисела или блага. Но, носот може да ни помогне да сфатиме однапред дали храната е вкусна.

Додека јадеме ја мирисаме храната и сетилото за мирис испраќа порака до мозокот дека храната е вкусна, што комбинирано со рецепторите за вкус, помага за едно подобро искуство.

Ги прави луѓето попривлечни

Сите сакаме да користиме парфеми кои се трајни, впечатливи и пријатни за сечиј нос.

Но, она што не го знаеме е дека всушност не е самиот мирис тоа што ги прави луѓето привлечни.

Неодамнешно истражување покажало дека со ставањето парфем, се чувствуваме посамоуверено заради пријатниот мирис кој го имаме, а тоа нè прави попривлечни.

Ве „носи низ времето“

Мирисот може да пробуди спомени и емоции поврзани со различни моменти од минатото.

 Мирисот на нешто може да нè врати низ времето, а има многу истражувања кои докажуваат дека мирисот може да активира поинтензивни емоционални спомени од сликите.

Влијае на расположението

Исто како што може да пробуди стари емоции и спомени, така мирисот може да предизвика нови емоции и да влијае на расположението.

Понекогаш може целосно да ви го подобри расположението и да ве релаксира, но и да ве направи нервозни – така функционира арома-терапијата.

Може да ве „излуди“

Луѓето кои не можат да мирисаат ништо или имаат намалено сетило за мирис, имаат поголем ризик за соочување со депресија.

Тоа се случува заради силната конекција помеѓу мирисот и емоциите, па неможноста да искусите различни мириси ја ограничува можност да ви се пробудат убави спомени и чувства.

Може да ве натера да купувате

Ова може да се нарече „перење на мозок преку нос“. Некои брендови за автомобили ставаат дополнителни мириси „на ново“ во автомобилите за да ве натераат да ги купите.

Некои продавници ставаат парфеми на влезот за да го следите мирисот и да купите нешто.

Пекарите, пицериите и слаткарите го испуштаат мирисот насекаде во околината па веднаш се упатувате да ја насладите душата со нешто.

Професионалците во секоја индустрија знаат кој мирис ќе го „убеди“ нашиот мозок да посака да купиме некој производ.

М. М. | Црнобело