Што значат малите симболи и логоа на вашите козметички производи?

Козметиката што секојдневно ја користиме е произведена од најразлични состојки, кои мора да бидат наведени на пакувањето. Но, покрај нив, постојат уште неколку симболи кои редовно ги има на амбалажата на козметичките производи.

Во продолжение, со помош на илустрации, ќе ви помогнеме да ги протолкувате сите симболи кои се испечатени на кутијата од кремата за лице или парфемот.

За среќа, нив ги нема многу, но сигурно во листата ќе препознаете барем еден кој сте го гледале во својот несесер.

PAO-ознака

Доаѓа од англискиот термин „Period After Opening“ и се однесува на рокот на траење на производот од датумот на отворање. Најчесто се комбинира со бројка и буквата М, што означува „months“, односно „месеци“.

Зајак во скок

Овој симбол покажува дека производот не е тестиран врз животни, во ниту еден момент од процесот на производство.

Стрелките што вртат триаголно (мобиус)

Покажува дека пакувањето може да се рециклира. Доколку до него или во него има бројка, тоа е процентот на рециклиран материјал употребен за изработка на пакувањето.

Ecocert

Оваа ознака ја има на природните и органски козметички производи. Кај органските значи дека во составот имаат најмалку 95% органски состојки, додека кај природната козметика означува најмалку 50% природни состојки.

Точка со стрелки

Најчесто е зелена, но ја има и во други бои. Сепак, значењето е единствено - компанијата е дел од европската шема на рециклирање и има стрикни правила за производство на пакувањата.

Песочен часовник

Овој симбол ни кажува дека производот има рок на траење 30 месеци од датумот на производство, без разлика дали е отворен или не.

Пламен

Појасен симбол од овој нема - производот е лесно запалив и треба да го држите подалеку од директен извор на светлина или топлина, а уште подалеку од пламен.

Е. Д. | Црнобело