Љубовницата на Пикасо и уште 7 најпознати музи на уметниците во 20-тиот век

Секој уметник, без оглед дали е музичар, писател, сликар или вајар, бара инспирација за своите дела. Понекогаш идеите можат да инспирираат, или престојување во идилична природа, дискусија, филозофија, социјална неправда. Но понекогаш уметниците својата инспирација ја наоѓаат во луѓето околу нив. 

На некој начин, овие влијателни личности можеме да ги наречеме музи. Некои уметници имаат потреба за фиксација за да можат да се изразат.

Ова е листа на неколку најистакнати музи кои ја обележаа историјата на уметноста:

Кики де Монпарнас (1901-1953)

Алис Ернестин Прин, попозната како Кики де Монпарнас била пејачка, модел и актерка. Ги дефинирала дваесеттите години на претходниот век што се однесува до модата, а била и модел за многу познати уметници: Жилијан Мандел, Жан Кокто, Пер Крог.

Мари - Тереза Валтер (1909-1977)

Мари - Тереза Валтер, љубовницата на големиот уметник Пабло Пикасо, му била инспирација во периодот на надреалистичката фаза. Како што Пикасо ја заменил жена му Олга Кохлова за Мари, така и Мари била заменета од Дора Мар, идната муза на Пикасо.

Гала (1894-1982)

Родена како Елена Ивановна Диаконова, подоцна позната како сопруга на најголемиот шпански надреалистичен уметник Салвадор Дали.

Пети Смит (1946-)

Роберт Меплторп и Пети Смит се запознале во шеесеттите години на минатиот век во Њујорк. Пети била темната хероина на панкот, додека Роберт бил темниот витез на фотографијата. Од цимери станале љубовници за потоа да станат долгогодишни пријатели.

Пети често позирала за него, додека тој креирал портрети за кавери на нејзините плочи.

Алба Клементе (1953-)

Девојка која била во друштво на уметници како Енди Ворхол и Жан-Мишел Баскијат, станала инспирација и големо откритие за нејзиниот иден сопруг, Франческо Клементе.

Еди Седгвик (1943-1971)

Еди Седгвик била американска актерка и манекенка. Како муза на Енди Ворхол станала една од најпознатите музи на дваесеттиот век. Седгвик има глумено во неколку кратки филмови на Ворхол, а големите Velvet Underground ѝ посветиле и песна „Femme Fatal“. Освен на Вархол му била муза и на Боб Дилан.

Дајан Китон (1946-)

Китон е американска филмска актерка, режисерка и продуцент. Кариерата ја започнала во театарот, а нејзината прва главна улога била во филмот „Кум“ (1972), но филмовите кои ја обележале нејзината кариера биле филмовите на Вуди Ален.

Филмот „Ени Хол“ (1977) ѝ донел Оскар за најдобра актерка, а токму таа му била инспирација на Ален за филмот.

Нора Барнакл (1884 - 1951)

Сопруга и муза на познатиот писател Џејмс Џојс. Нивниот однос бил многу сложен, бидејќи имале различни карактери, различни вкусови и културни интереси.

Ашера | Црнобело