Што знаеме за окото на Хорус?

Често се вели дека очите се прозорци на душата и дека еден поглед зборува повеќе од илјада зборови. Човекот со очите го гледа физичкото, а понекогаш и невидливото. Поради овие карактеристики окото добива повеќеслојно симболично значење.

Од митските времиња во Египет окото имаше посебно свето значење и моќ, а беше поврзано и со различни божества. Окото кое гледа сè или окото на провидението е термин кој е вкоренет во египетската митологија, а обично е поврзан со големиот египетски бог-сокол Хорус.

Хорус, бог кого Египќаните го прикажувале во форма на јастреб, е еден од најстарите богови на древниот Египет. Името Хорус е латинизираната форма на грчкото име Хорос, кое потекнува од египетскиот Хор и го означува небото.

Во раните текстови тој е познат како син на богот Ра и брат на Изида, Озирис, Сет и Нефтис. Тој е Бог на небесниот свод, а неговите очи се Сонцето и Месечината. Тој е и лицето на небото, посредник помеѓу небото и земјата, боговите и луѓето.

Во својот втор, подоцнежен аспект, Хорус е син на Изида и Озирис, кој исто така се нарекува Хорус Помладиот.

Двете форми се поврзани со познатата митска борба помеѓу Хорус и Сет за престолот, која, исто така, ја симболизира борбата помеѓу светлината и темнината. Во таа борба, Хорус го победува Сет но го губи левото око.

Тот, богот на мудроста, успева да го излечи окото на Хорус и да му го врати. Оттогаш, левото око на Хорус симболично ја претставува Месечината, додека десното око го симболизира Сонцето, и се нарекува окото на Ра.

Окото на Хорус за Египќаните претставуваше мистичен извор на живот, а се веруваше дека заштитува од негативни влијанија. Затоа е честа амајлија во Египет до ден денес.

Окото на Хорус може да се види на бродовите, на саркофазите, во погребните ритуали и сл.

Сите овие облици на окото, без оглед на времето, се многу слични. Окото на Хорус е нацртано во форма на човечко око со веѓа, но со елементи што потсетуваат на окото на сокол.

Во заднина на оваа повеќеслојна симболика на окото на Хорус стои вечната борба помеѓу светлината и темнината, доброто и злото.

Окото на Хорус нè потсетува дека очите секогаш треба да ни бидат отворени.

Ашера | Црнобело