Уште уникатни идеи: Вапцајте ги велигденските јајца со чај

Во последниве години сè попопуларни се природните начини на бојадисување на велигденските јајца, наспроти купувањето вештачки бои и пигменти.

Вапцање со чај и други природни состојки се одличен начин да спречите во јајцето да навлезат бои и хемикалии, но и да добиете уникатни нијанси и ефекти врз лушпата.

Постапка:

Сварете јак чај и оставете да отстои со кесичката или листовите најмалку 10 минути. Во изладениот чај ставете малку оцет и потопете ги јајцата. Чувајте ги во фрижидер преку ноќ. Наредниот ден ќе добиете уникатни јајца кои ќе ја красат вашата велигденска трпеза.

Каков чај и комбинации да користите за да добиете различни бои?

На пример, за да добиете нијансирано мермерно јајце во тонови на розовата боја, оставете ги јајцата во јак чај од хибискус во кој се оставени  и ливчињата од растението.

Складно розови јајца ќе добиете ако измешате една чаша црн чај со една чаша сок од цвекло.

За виолетови јајца ви е потребна смеса од црн чај и црно вино во сооднос 1:1.

Жолти јајца ќе добиете ако измешате чај од камилица, јак зелен чај и една лажичка куркума.

Со мешавина од чај од шипинка и хибискус ќе добиете интересна сива нијанса.

Портокалови јајца на природен начин се добиваат со помош на рооибос чај и куркума.

Доколку ги потопите во јак црн чај, ќе добиете кафеава нијанса на јајцата.

Е. Д. | Црнобело