Од куртизана до шпион: Мата Хари – жената која не се плашeла да ја погледне смртта во очи

Историјата ја памети Мата Хари како двоен шпион, егзотична танчарка и куртизана. Родена како Маргарета Гертруда Зеле во 1876 година во Леуварден, Холандија, Мата Хари била танчарка, куртизана и шпионка, која го привлекувала вниманието со својата убавина, харизма и интелигенција. 

Во својот живот имала неколку љубовници, фасцинирани од нејзиниот провокативен и мистичен изглед. Станува збор за политичари и влијателни луѓе од многу земји, главно од Франција, Русија и Германија. Во текот на Првата светска војна, Французите ја обвиниле дека шпионирала за Германја, по што ја убиле во 1917 година. Ова е приказната на фамозната, озлогласена и единствена - Мата Хари.

Родена е како Маргарета Гертруда Зеле на 7 август, 1876 година, во Леуварден, Холандија. Маргарета била разгалена ќерка на еден трговец, кој често ѝ подарувал скапи подароци. Семејството живеело во благосостојба до нејзините тинејџерски години, кога нејзината мајка починала, а таткото го банкротирал семејството.

На 19-годишна возраст се омажила за воениот капетан Рудолф Меклауд, по само една недела додворување, со кој отпатувала во источна Индија. Рудолф, кој бил пијаница и коцкар, вербално и физички ја злоупотребувал.

Кога конечно се развеле, Меклауд станал старател над едното дете, додека другото починало под нејасни околности пред нивниот развод.

Мата Хари тогаш почнала да позира гола и да се занимава со проституција и егзотичен танц. Во својот танц ги комбинирала и движењата што ги видела за време на нејзиниот престој во Индија.

Својата кариера ја започнала во Париз, кој ја прифатил со раширени раце. Токму таму и тогаш почнала да го користи своето уметничко име - Мата Хари, што значи „сонце“ или „слика на денот“, име по кое останала позната во историјата.

Мата Хари била висока, атрактивна и вешта во индиските танци, а танцувала, речиси, гола. Со своите изведби го привлекувала вниманието и на германската и на француската влада.

Кога започнала Првата светска војна таа настапувала во Германија. Иако била сметана за Французинка, сите нејзини предмети биле конфискувани. Германскиот конзулат не сакал да ѝ ја надомести загубата, но и понудил пари во замена за шпионирање на Франција.

Мата Хари почнала да го привлекува вниманието и на француската разузнавачка служба, која сакала да ја депортира. Но наместо тоа, умната танчарка ги убедила да шпионира за нив. Во тој момент Мата Хари станала двоен шпион.

Уапсена е во една рација во еден луксузен хотел во Париз. Пред почетокот на судењето поминала пет месеци во женскиот затвор во Сан Лазаре. Судењето било затворено за јавноста.

Мата Хари е осудена за шпионажа, по што е убиена на 15 октомври во 1917 година. Таа побарала да се соочи со смртта без превез преку очите.

Животот на фаталната жена и легендарната шпионка е тема на околу 250 книги и романи, како и многу филмски сценарија.

Ашера | Црнобело