Како авиокомпаниите ги чистат авионите толку брзо?

Доколку сте летале со авион, најверојатно воопшто не сте ги забележале чистачите на леталото.

Сепак, чистењето на авионите е важен дел од патувањето, и тоа не само затоа што го прави целото искуство поудобно - со чистењето се отстрануваат микробите и микроорганизмите што можат да им наштетат на патниците.

Авиокомпаниите работат постојано со цел да им овозможат чист простор на своите патници. Ова чистење треба да се заврши за само неколку минути, а кога ќе се земе предвид краткиот период, јасно е дека е потребна добра организација.

При чистењето, најмногу внимание се обрнува на местата каде што се приготвува храната, тоалетот, седиштата и масичките. Па, сигурно се прашувате како овие луѓе успеваат да го завршат сето ова за само неколку минути.

Денешните компании за чистење користат технологија за да дознаат кога слетува некој авион и какво чистење е потребно за него. Па веднаш штом ќе слета авионот, чистачите можат да се фатат за работа.

Точната постапка за чистење на авионот зависи од неколку фактори, како времето кое авионот ќе го помине на земјата и дали летот е домашен или интернационален. Воглавно, постојат 3 операции за чистење:

Брзо чистење: Ова чистење е за авиони кои треба да полетаат за брзо. Воглавно чистачите се фокусираат на тоалетот, фрлање на ѓубрето и чистење на седиштата.

Прекуноќно чистење: На овој начин се чистат сите летала кои ги завршиле своите тури за изминатиот ден. Најчесто овие авиони остануваат на земја околу 8 до 10 часа. Во овој случај, чистачите обрнуваат повеќе внимание на просторот за седење, како и на тоалетите.

Длабинско чистење: Длабинското чистење на авионот е слично како и длабинското чистење на автомобил. Седиштата и другите површини се отстрануваат и темелно се чисти целиот простор. Некои авиокомпании имаат и специјализирана опрема што им помага во длабинското чистење.

Во зависност од условите, потребни се од 5 до 12 луѓе за чистењето на авионот. Секој од нив си има своја задача, па целиот процес е многу поефикасен.

Најтешкиот вид чистење е брзото чистење, најмногу бидејќи на сите патници им е потребно различно време за да излезат од авионот. Доколку празнењето на авионот е подолго, чистачите имаат многу помалку време да ја завршат својата работа. Кога авионот доцни, неретко во чистењето се вклучуваат повеќе луѓе.

Друг предизвик за чистачите е справувањето со заборавените предмети на патниците. Овие предмети се запишуваат, се прави фотографија од нив, а потоа ги презема авиокомпанијата додека не се најде нивниот сопственик.

Спирова С. | Црнобело