Зошто настанува метеорскиот дожд Персеиди и како да го набљудувате вечерва?

Метеорскиот дожд Персеиди е еден од најпознатите, најмногу бидејќи е и еден од најспектакуларните.

Ова е астрономски настан на кој му се восхитуваат и астрономите, но и „обичните“ луѓе и некои години, кога небото не е осветлено од Месечината, можат да се забележат и до 100 метеори во еден час.

Овој метеорски дожд трае од 17-ти јули до 24-ти август, но неговиот пик е вечерва, ноќта помеѓу 11-ти и 12-ти август.

Што точно се Персеидите?

Повеќето метеорски дождови, вклучувајќи ги и Персеидите, настануваат од остатоците од опашката на некоја комета. Во овој случај, станува збор за кометата Swift-Tuttle.

Оваа комета е едно од најголемите небесни тела кои редовно поминуваат покрај Земјата, а нејзиното цврсто јадро има ширина од дури 24 километри. Кометата, орибтирајќи околу Сонцето, последен пат помина покрај Земјата во 1992-ра, а повторно ќе ја помине дури во 2126-та. Во меѓувреме, нашата планета секоја година минува низ прашината и отпадот што ги остава кометата, а ние го гледаме тоа како метеорскиот дожд Персеиди.

Едноставно кажано, кога ги гледате Персеидите, всушност ги гледате остатоците од кометата кои навлегуваат во атмосферата на Земјата и согоруваат. Кога се во вселената, овие остатоци се наречени метеороиди, а кога ќе навлезат во земјината атмосфера се наречени метеори.

Метеорите се движат со брзина од околу 59 km/h, а бидејќи повеќето се големи колку зрно песок, целосно согоруваат и не паѓаат на земјата.

Името Персеиди, пак, е поради соѕвездието Персеј – кога го набљудувате дождот, се чини како метеорите да доаѓаат од оттаму. Соѕвездието се наоѓа на северното небо, но не мора да гледате само таму за да забележите некој метеор.

Кога и каде можете да ги набљудувате?

Како што напоменавме, пикот на Персеидите ќе биде ноќта помеѓу 11-ти и 12-ти август, па најдобро е да ги набљудувате вечерва.

За разлика од лани, годинава Месечината нема многу да го осветлува небото, па ќе можете да уживате во ѕвезденото шоу. Најважно е да најдете што е можно потемно место, но и да се подготвите да чекате неколку часа.

Препорачливо е да го набљудувате небото после полноќ и не заборавајте дека на вашите очи ќе им требаат околу 30 минути да се адаптираат на темницата.

Каква опрема ви треба?

Овој метеорски дожд се набљудува без никаква опрема. Единствено понесете нешто удобно за седење, а може и малку храна, во случај да чекате повеќе.

Спирова С. | Црнобело