Зошто „се ежиме“ кога ни е ладно, кога слушаме музика и кога сме возбудени?

Таканареченото ежење на кожата е сосема нормална реакција на нашето тело и најчесто е поврзана со нагла промена на температурата.

Но, оваа реакција може да биде предизвикана и од други фактори, како страв или каква било силна емоција – кога гледаме филм, слушаме музика…

Ако некогаш сте се запрашале која е точната причина и кој е механизмот зад ова ежење, можете да дознаете во продолжение:

Што се случува во овие мигови?

Ежењето настанува поради брзата контракција и релаксација на мускулите. Мускулите кои се наоѓаат околу коренот на влакното се стегнуваат, па поради тоа влакната на кожата изгледаат наежено. Исто така овие контракции го предизвикуваат и препознатливото чувство низ целото тело.

Кога ни е ладно

Кога одеднаш ќе ви застуди, сигурно забележувате дека влакната на кожата се наежени. Оваа реакција на организмот е поради ниската температура – мускулите почнуваат брзо да се стегнуваат и релаксираат, со тоа генрирајќи топлина.

Се претпоставува дека оваа реакција сме ја наследиле од предците кои, за разлика од нас, имале густо крзно. Со ежењето на влакната од крзното, се создава еден вид изолација кој им помагал да се загреат. Истото важи и за скоро сите животни со крзно.

Денес ние луѓето имаме значително помалку влакна, па ежењето го нема потполно истиот ефект.

Кога слушаме музика

Ежењето може да настане и како одговор на некоја силна емоција, како кога слушаме одреден вид музика. Според едно истражување, емотивната музика активира делови од мозокот одговорни за задоволство, слично како храната или сексот. Исто така, слушањето емотивна музика може да го поттикне и лачењето на допамин.

Кај испитаниците кои се наежиле од слушањето музика, била забележана и зголемена активност на одредени мозочни бранови. Сепак, уште не е јасно зошто музиката има вакво силно влијание врз нас. Според еден од авторите на истражувањето:

„Она што е интригантно за музиката е тоа што изгледа дека нема никаква биолошка вредност, ниту ни помага да преживееме. Допрва треба да откриеме зошто музиката ни делува наградувачки и има такво влијание врз нас“.

Кога гледаме емотивни филмски сцени

Кога гледаме филм, во него можат да бидат вметнати многу фактори кои ќе нè наежат како музика, акција, напнатост, исчекување, емотивни моменти… Сето ова, во комбинација со добар визуелен приказ, може дополнително да „нè наежи“.

Во едно истражување, научниците дошле до заклучок дека испитаниците најчесто се ежеле на кулминацијата во филмот, особено ако станува збор за драма или авантуристички филм. Се покажало и дека испитаниците најмногу се ежеле кога во филмот биле прикажани дела како херојство или саможртвување.

Исто така, според експертите, многу е голема веројатноста да се наежиме ако сведочиме на моќна промена во емоциите на ликот што го гледаме.

Кога среќаваме одредени луѓе

Кога се ежиме откако ќе здогледаме или помислиме на некого, тогаш се активира нашиот одговор за опасни и стресни ситуации кој сме го наследиле од предците, по што во организмот почнува да се лачи адреналин. Ова настанува кога таа личност потсвесно ја сметаме за опасна. Сепак, истото може да се случи и ако сме возбудени или гледаме личност што ни се допаѓа.

Генерално, уште не се точно познати сите причини за овој одговор на организмот и допра треба да се истражува на оваа тема.

Спирова С. | Црнобело