Кои раси на кучиња најчесто добиваат топлотен удар, според ветеринар?

Расите со сплескана муцка како мопс потешко се разладуваат, па поради ова се посклони кон топлотен удар.

Со температури кои надминуваат 35 степени Целзиусови, навистина е важно да ги заштитиме и милениците, особено кучињата кои во текот на денот мораат да бидат изнесени надвор.

Ако имате куче, важно е да знаете дека некои раси се помалку толерантни на високи температури. Ова значи дека ризикот кај нив да се појави топлотен удар е значително поголем.

Покрај очигледните, како самојед, има и раси за кои веројатно не би помислиле дека тешко се справуваат со многу топлото време.

Со цел да ја зголеми свесноста кај сопствениците, млад ветеринар од Англија, кој е популарен на ТикТок, сподели видео во кое открива кои раси се изложени на најголем ризик од топлотен удар.

Тој открива седум раси, за кои вели дека „не се создадени за топло време“.

„Седма на листата е расата стафордширски бул териер.

Овие кучиња имаат кратко крзно, но мускулести се, а мускулите генерираат многу телесна топлина“, вели ветеринарот.

Тој додава дека овие кучиња се и склони кон стрес, па е особено важно да внимавате на нив во текот на летото.

„Шестата раса се померанците.

Имаат многу густо крзно и кратка муцка, што значи не можат ефикасно да се разладат преку устата“.

Следните раси на листата на ветеринарот се мопс, француски булдог и англиски булдог.

Односно, како што вели ветеринарот, трите раси со „сплескана муцка“.

„Ние луѓето се разладуваме преку целото тело, со потење. Кучињата се потпираат на нивното грло и нивниот нос.

Кога дишат брзо, воздухот се движи низ носот и грлото, па тие губат топлина (и се разладуваат). Кучињата со кратки муцки, не можат да се ослободат од топлината доволно брзо“.

Друго куче кое се најде на листата на ветеринарот е расата чау-чау. Тој истакнува дека кај овие кучиња, ризикот од топлотен удар е 11 пати поголем отколку кај лабрадорите.

Расата која е изложена на најголем ризик е њуфаундлендер, кај која ризикот од топлотен удар е 15 пати поголем отколку кај лабрадор.

„Оваа раса не е создадена за топло време. Ова се масивни кучиња, со густо крзно.

Расата е создадена за ниски температури, студена вода, а не 30 степени Целзиусови“.

Што да направите ако вашето куче има топлотен удар?

Симптомите на кои треба да обрнете внимание се многу гласно и забрзано дишење, лигавење, црвени непца или јазик, забрзано чукање на срцето, повраќање или дијареја.

Ако забележите и само еден симптом, препорачливо е да реагирате веднаш.

Важно е да ја намалите температурата на кучето. Можете да го однесете во разладена просторија или да го испрскате со вода која не е многу студена.

Немојте никако да го потопувате кучето во вода.

Можете да користите вентилатор или нешто слично за да го разладите.

Однесете го кучето на ветеринар што е можно побрзо бидејќи топлотниот удар може да биде и смртоносен.

Сепак, секогаш е многу подобра превенцијата.

Ако имате една од расите кои се поподложни на топлотен удар, не го изнесувајте кучето кога е најжешко.

Кога сте излезени, секогаш носете вода за кучето и не го оставајте на директна сончева светлина.

Не заборавајте и дека кога асфалтот е многу жежок, може да му ги повреди шепите. Во продавниците за миленици можете да најдете соодветна заштита за шепи.

Погледнете го видеото:

@ben.the.vet

If you own one of these 7 dog breeds please be especially cautious in hot weather heatwave learnontiktok heatstroke dogs hotdog benthevet veterinary fyp

♬ vlog, chill out, calm daily life(1370843) - SUNNY HOOD STUDIO

Спирова С. | Црнобело