Тажен ден во Скопје ЗОО - Од канцер почина јагуарката Инес

„Инес во длабока старост не ја издржа битката со најлошата болест - денеска нè напушти, борејќи се со метастазиран канцер и тумори на повеќе органи“ - велат од ЗОО Скопје за една од најстарите жителки за зоолошката.

Инес, јагуарката која долги години живееше во Скопје ЗОО, почина од метастазиран канцер и тумори на повеќе органи.

Веста за нејзиното угинување ја соопштија од зоолошката.

„За жал Инес во длабока старост не ја издржа битката со најлошата болест.

Денеска нè напушти, борејќи се со метастазиран канцер и тумори на повеќе органи.

Изминатиот период заедно со Факултетот за ветеринарна медицина направиме сè што може за подобрување на благосостојбата на јагуарката и олеснување на здравствените проблеми преку стручни прегледи, анализи и компјутерска томографија до лекување на оваа страшна болест која одзема милиони жртви годишно, како кај луѓето, така и кај животните.

Јагуарката Инес имаше 22 години, а просечниот животен век на овие величествени мачки во природата е од 12-15 години, додека во зоолошките градини најстарите животни доживуваат до 23 години.

Искрено ќе фалиш на целиот тим на ЗОО Скопје и зоонегувателите кои со години се грижеа за тебе. Беше една од највозрасните жители на зоолошката и чувана со многу љубов“ - пишува во објавата на Фејсбук.

Од Инес се прости и поранешниот директор на Скопската зоолошка, кој напиша:

„Мирно небо Инес. Беше најубава од сите“.

Погледнете ја објавата од Скопје ЗОО:

А. Ј. | Црнобелo