Невербална комуникација: Што сака да ви каже вашата мачка преку нејзиниот опаш?

Мачките имаат разни облици на комуникација. Освен мјаукањето, овие симпатични и паметни животни користат специфични движења со целото тело за да искажат одредени чувства. Нивниот опаш е особено важен во нивната невербална комуникација.

Ако сакате да разберете што вашето маче сака да ви каже, тогаш овие 9 позиции на неговото опавче сигурно ќе ви откријат:

1. Подигнат и закривен на врвот

Позицијата во која опашот на мачката во облик на прашалник е подигнат високо во воздухот, значи дека е заигран и весел. Станува збор за пријателска положба која го повикува вашето внимание преку игра и заедничка забава.

2. Надуен опаш

Опашот на кој влакната се наежени и изгледа двапати подебел од обично е знак на страв. Ако покрај него мачката ги зашилила и своите уши и го свиткала грбот станува збор за одбранбена позиција. Всушност, во оваа положба мачката изгледа поопасно за да може да се заштити од потенцијална опасност.

3. Спуштен опаш

Ако вашата мачка го спуштила својот опаш на подот и полека го врти од една страна на друга, тоа може да значи колебање. Таквата позиција значи дека некој или нешто го привлекло нејзиното внимание и поради тоа се чувствува несигурно и станува внимателна. Оваа поза е најзабележлива кога мачката е надовор од домот и кога го слуша и испитува просторот во кој се наоѓа.

4. Рамен опаш во воздухот

Ако вашиот домашен миленик го држи својот опаш рамно и високо во воздухот, знајте дека станува збор за многу позитивни емоции. Оваа положба опишува самодоверба, среќа и возбуда. Мачката сака да ви каже дека се радува што ве гледа и ви посакува добредојде.

5. Завиткан опаш

Ако мачката лежи и опашот ѝ е завиткан околу ногата тоа опишува максимална релаксираност, задоволство и безгрижност. Ако пак го витка опашот околу вас или други мачиња тоа е знак на искрено пријателство. Оваа позиција е индикатор на љубов и голема доверба.

6. Замавнува

За разлика од кучињата кои со замавнување на опашот даваат знаци дека се весели и разгирани, мачките тоа го прават кога се лути и иритирани. Оваа позиција опишува лутина, а во некои ситуации и страв и недоверба.

7. Мали поместувања

Мачките кои полека го поместуваат опашот од една страна на друга, виделе нешто што им го привлекло вниманието. Ваквата положба е забележана кога ќе види птица, мува или пак сака да ја фиксира играчката. Следниот чекор по ваквото замавнување најчесто е скок.

8. Помеѓу шепите

Кога е во прашање повлекување на опашот меѓу нозете, причината за тоа на мачињата и кучињата е комплетно иста. Оваа положба опишува страв и покорност, а мачките најчесто го искажуваат тоа кога се надвор или пак во нова и неистражена околина.

9. Подигнат опаш и се тресе

Ако мачката го држи својот опаш исправено и се тресе како да вибрира, станува збор за говор на телото кој опишува возбуда, нетрпение и среќа. Тоа може да значи дека мачката уловила плен, но и дека е многу среќна што ве видела – што може да го сфатите како огромен комплимент, бидејќи мачките никогаш не лажат. 

С. С. | Црнобело