Митови за животните кои сигурно сте ги слушнале, а не се воопшто точни

Кучињата гледаат црно-бело, ноевите си ја закопуваат главата во земја кога се во опасност…

Митовите постоеле и ќе постојат, но денес барем лесно можеме да провериме што е точно, а што не.

Сепак, во некои митови веруваме толку одамна, што не би се ни сетиле да ги провериме.

Шест популарни митови за животните во кои не треба да верувате:

Мит 1: Кучињата гледаат црно-бело

Точно е дека кучињата поразлично ги гледаат боите, но ова не значи дека гледаат црно-бело.

Луѓето имаат три вида фоторецептори, додека кучињата имаат два, што значи дека перципираат помалку бои од нас.

Тие можат да разликуваат сини и жолти нијанси, но црвените и зелените нијанси им изгледаат сиви.

Мит 2: Биковите мразат црвена боја

Овој мит е толку популарен, што честопати бил користен како шега во цртани филмови и комедии.

Но, исто како кучињата, и биковите не ја гледаат црвената боја.

Она што го разгневува бикот на борбите со матадори е движењето на црвената наметка, но и фактот што животните се под стрес.

Матадорите, пак, имаат црвени наметки за да се прикријат трагите од крв кои се неизбежни.

За среќа, ваквите борби со бикови стануваат реткост бидејќи многу луѓе ги сметаат за вознемирувачки, но и за непотребно измачување на животните.

Мит 3: Бувовите се многу интелигентни

Поради цртаните филмови, но и нивниот по малку мистичен изглед, се проширило верувањето дека бувовите се многу интелигенти, па дури и мудри птици.

Во реалноста, бувовите не се попаметни од другите грабливки.

Многу попаметни се враните и гавраните кои неретко се сметаат и за најинтелигентните птици.

Мит 4: Ноевите си ја закопуваат главата во земја

Нема кој не го слушнал митот дека ноевите си ја закопуваат главата во земја кога се во опасност.

Ова не е воопшто точно – кога сметаат дека се во опасност и не можат да избегаат, ноевите седнуваат на земја и пробуваат да се камуфлираат.

Можно е да видите ној со главата во земја, но не бидејќи се крие.

Тие копаат плитки дупки кои ги користат како гнезда за нивните јајца. Кога ги проверуваат јајцата, оддалеку може да изгледа како главата да им е во дупка.

Мит 5: Пчелите боцкаат само еднаш

Ова е делумно точно бидејќи зависи од видот на пчелата.

Некои пчели, како европската медоносна пчела, навистина боцкаат само еднаш, го остават осилото на местото на убодот и набрзо потоа умираат.

Но, медоносните пчели (оние кои произведуваат мед) сочинуваат многу мал процент од сите пчели на светот.

Поголем дел од пчелите не боцкаат само еднаш и не умираат по убодот.

Мит 6: Лилјаците се слепи

Точно е дека лилјаците се ориентираат со помош на ехолокација – испуштаат звук, кој се одбива од околните предмети и така знаат како да се движат.

Но, тие исто така имаат и функционални очи.

Некои видови имаат толку изострен вид, што не ни користат ехолокација.

Спирова С. | Црнобело