5 раси на кучиња идеални за семејства со дечиња

Ветеринарите и познавачите на животни најмногу ги препорачуваат овие 5 раси на кучиња како одличен избор за семејства со мали дечиња.

Без никаков обид за дискриминација, сепак загриженоста за одредени раси на кучиња е оправдана, бидејќи истите не се најпаметен избор за семејства со мали дечиња со оглед на нивната поагресивна природа или понискиот праг на толеранција кога вашите малечки ќе демонстрираат изливи на љубов кон домашното милениче.

Па кои се петте раси на кучиња идеални за семејства со дечиња?

Кокер шпаниел

Меко крзно, долги ушиња и секогаш подготвени за игра. Кокер шпаниел е секако број еден кога станува збор за домашно милениче куче, особено доколку децата се мали.

Одгледувачите на кучиња се согласуваат дека оваа раса е фантастична за семејства со деца - тие се мали, непретенциозни, не прават многу бучава и врева и остануваат мирни дури и кога децата слатко ги „малтретираат“.

Лабрадор

Доколку имате куќа и двор, односно место за малку поголемо куче, идеален избор за вас е лабрадор. Иако се големи кучиња, лабрадорите се сосема безопасни и многу послушни, па затоа е лесно да се истренираат.

Тие се многу пријателски настроени и сакаат да го поминуваат времето надвор, па децата со лабрадорот ќе бидат прилично активни и постојано во трчање наоколу.

Џуџест шнауцер

Овие неодоливо симпатични кученца потекнуваат од Германија и се едни од најпопуларните домашни миленици, најмногу поради нивната неагресивност и малата големина.

Крзното на малиот шнауцер може да биде во четири бои: црна, црно-бела, црно-сребрена и бела.

Мопс

Уште едно куче што спаѓа во расите на мали кучиња. Ќе се вљубите во нивната кратка муцка, збрчканото лице и витканата опашка во облик на спирала.

Мопсовите имаат одличен карактер, без некои огромни барања. Тие само сакаат да се галат, по малку се мрзеливи и преферираат да седат и да си играат дома.

Бигл

Многу интелигентни, и по малку тврдоглави овие кучиња имаат изострено сетило за мирис и префинет инстинкт за трагање, па бидете сигурни дека ќе го следи и заштитува вашето малечко каде и да оди.

Бигл расата се одликува со пријатен темперамент, дружељубиви се, а и ретко имаат здравствени проблеми.

(О)Милена | Црнобело