Дали и колку долго е во ред да го оставите кучето само дома?

Сигурно доколку би можеле, секој миг би го минувале со вашето куче. Но, за жал, во текот на денот имате многу обврски каде што едноставно не можете да го понесете вашето милениче. Па секое утро пред работа, се поздравувате со вашето куче и го оставате дома. Но дали е во ред да го оставате кучето само дома?

Ова прашање нема еден точен одговор бидејќи секое куче е различно и си има различни потреби. Возраста, здравјето и проблемите со анксиозност се важни фактори што треба да се земат предвид за да се одговори прашањето.

Сепак, ветеринарите имаат неколку совети што ќе ви помогнат да ја донесете вистинската одлука.

На повеќето кучиња не им е проблем да седат сами

Воглавно, на кучињата не им е проблем да бидат сами дома, и тоа дури и по 10 часа. Сепак, важно е да знаете дека секое куче има потреба да оди во тоалет и да вежба.

Па доколку вашето куче не може да се воздржи дури да се вратите дома, веројатно ќе треба да си доаѓате порано или да најдете друго решение.

Истовремено, не заборавајте дека кучињата се социјални суштества. Па дури и ако вашето куче нема проблем да седи само, експертите советуваат да се обидете да го видите во текот на денот.

Прво оставање на малото куче дома

Малите кученца можат да останат сами од 3 до 6 часа. Кога имате ново мало кученце, важно е да создадете околина без стрес. Па доколку го оставате кучето само, добро е да му набавите некаква играчка.

Ново куче вдомено од засолниште

Кога ќе ги земете предвид околностите со коишто се соочиле кучињата по засолништата, не е ни чудно што кај нив анксиозноста е поизразена. За да го навикнете ова куче да останува дома само, прво почнете со неколку часа на ден.

Ако сè е во ред, почнете да го зголемувате временскиот интервал.

Прв пат во кафез

Некои луѓе ги оставаат кучињата дома во кафез. Доколку имате размислувано за ова, сигурно не сакате вашето куче да се чувствува како во затвор. Па без разлика какво куче имате, најпрво навикнете го на кафезот. Направете го што е можно поудобен и додека сте дома, држете ја вратата отворена.

Стари кучиња

Доколку имате постаро куче, можно е кај него да постои проблем со контролирањето на мочниот меур. За да ги избегнете незгодите, обидете се да се вратите дома во средината на денот, или најдете некој што ќе го направи тоа.

Исто така, најдобро е да го оставите кучето во просторија без тепих, но не заборавајте да му ставите и креветче.

Спирова С. | Црнобело