Чување куче во стан: Што треба да знаете ако се одлучите на овој чекор?

Научете го да останува само

Кога ќе одите на работа или секојпат кога ќе го оставате кучето само дома, тоа сигурно ќе почне да тагува по вас. Ова тагување може да го покаже и со лаење и завивање – нешто што сигурно ќе им пречи на соседите.

Затоа, осигурете се дека вашето куче ќе има што да прави додека е само. Оставајте му играчки, скријте храна низ домот за тоа да ја најде и слично.

Создадете рутина

Најважното нешто е да го научите кучето да врши нужда надвор. За да успеете во тоа, најдобро е да го изнесувате после секој оброк. Препорачливо е и секојпат кога го изнесувате за тоа, да одите на исто место. Ако кучето е помало од 6 месеци, имајте на ум дека ќе треба да го изнесувате почесто.

После оброк не го терајте кучето да си игра – полниот стомак може да му предизвика проблеми.

Социјализација

Важно е кучето да знае како да се однесува со други луѓе и кучиња, односно да не покажува агресија кон нив. Најпрво, запознајте го со членовите на семејството и блиските пријатели. Потоа почесто шетајте го на места каде што има луѓе и други кучиња и секогаш кога ќе се однесува добро, дајте му мала награда.

Бидејќи социјализацијата е процес што може да потрае, особено ако станува збор за постаро куче, и во овој случај мора да бидете трпеливи.

Ветеринар и план за вакцинација

Ова важи за сите кучиња, независно дали ќе ги чувате во стан, куќа или двор. Добро би било веднаш да најдете ветеринар кој ќе се грижи за вашето куче. Тој ќе ви каже колку често треба да правите рутински проверки, а и ќе ви помогне да направите план за вакцинација.

Добро би било да се консултирате со ветеринарот и за која храна е најдобра за вашето куче.

Минувајте квалитетно време со кучето

Ако сакате кучето да биде среќно, во текот на денот морате да одвоите време само за него. Покрај редовните излегувања за вршење нужда, најдете време и за прошетка или за каква било игра, без разлика дали сте надвор или дома. Кучињата се социјални суштества и мора да им посветите многу внимание. Ова исто така важи за сите кучиња независно каде ги чувате, но сепак е поважно за кучињата кои кога се сами, се затворени во стан, а немаат цел двор на располагање.

Погледнете и Кучиња за во стан: 10 раси кои не оставаат влакна

Спирова С. | Црнобело