Имаат над 50 години, а изгледаат одлично: Како ја одржуваат формата супермоделите од ’90-тите?

Синди Крафорд, Наоми Кемпбел и Кејт Мос имаат над 50 години, но и понатаму изгледаат одлично. Тие ја открија својата рутина за топ изглед.

Светските супермодели од 1990-те и денес можат да излезат на писта и да им парираат на денешните манекенки. Дел од нив се активни и денес, па повремено снимаат реклами или имаат фотосесии за познати брендови.

Наоми Кемпбел, пак, не се откажува ни од ревиите и често знае да се прошета на модната писта, особено кога станува збор за дизајнери или модни куќи кои ги смета за свои пријатели.

Но, како ја одржуваат формата на 50+ години?

Синди Крафорд, Кејт Мос и Наоми Кемпбел ја открија тајната на својот изглед:

Наоми Кемпбел

Има 53 години, но и понатаму импресионира со својот став и става кога ќе појави на модна писта. Иако поминаа три децении од нејзиното прво појавување во светот на модата, таа како воопшто да не е сменета.

На прашањето која е тајната на совршениот изглед и како успева да остане слаба и згодна, таа вели дека јаде многу малку:

„Само ручам. Некогаш ручекот е вечера, бидејќи скоро никогаш не јадам повеќе од еднаш во текот на денот.

А, има и денови кога не јадам воопшто, туку само пијам сокови или вода“.

Кејт Мос

Долги години Кејт Мос велеше дека не вежба и не држи диети, а својата витка става ја припишуваше на генетиката.

Манекенката на 16 јануари 2024 ќе полни 50 години. Таа сега веќе признава дека метаболизмот ѝ е сменет, и иако изгледа скоро исто како во времето кога беше на врвот на кариерата, Кејт сепак смени некои животни навики.

„Никогаш не сум одела во теретана или во каков било фитнес центар.

Но, работите се поинакви, веќе некое време вежбам постојано, па освен што ги чувствувам разликите во изгледот на своето тело, сфатив дека уживам во самото вежбање“, вели Мос.

Таа призна и дека повремено прави детокс на организмот, а дека голема помош за тоа има од својот личен инструктор по јога.

Синди Крафорд

Во врвот на својата слава, Синди Крафорд издаде неколку видеа со вежби, кои станаа вистински хит во светот.

Таа покажа дел од својата фитнес рутина и откри како ја одржува формата дури и денес, на 57 години.

„Ретко кревам тегови, но трипати неделно имам кардио тренинзи. Скокам на трамбулина, трчам на лента или трчам на плажа, бидејќи од дворот на нашата куќа има скали кои водат до плажа.

Понекогаш слушам музика или аудио книги додека 'одам' по подвижни скали и тоа трае околу 20 минути“, вели Крафорд.

А. Ј. | Црнобело