Јога пози со кои ќе го подобрите капацитетот на белите дробови

Одредени јога пози ги „отвораат“ градите при што се подобрува протокот на воздухот во белите дробови. Со редовно вежбање, овие вежби можат да ги подобрат здравјето и капацитетот на белите дробови, а истовремено да ви помогнат да се справите со стресот.

Сигурно веќе многупати сте слушнале за големите бенефити кои ги нуди јогата. Ако успеете да најдете барем неколку минути во денот и да се посветите на јога, тогаш навистина ќе го подобрите вашето здравје.

Покрај другото, практикувањето јога го подобрува и здравјето на белите дробови. Длабокото, свесно дишење кое се практикува, помага да се зголеми капацитетот на белите дробови, а покрај ова ја поттикнува и целокупната кондиција, намалувајќи го ризикот од респираторни проблеми.

Кога вежбате јога, треба да останете во секоја поза одредено време. Ако сте почетници, доволно е и по 30-тина секунди. Кога вежбате, важно е да не чувствувате непријатност или болка, туку само благо истегнување во одредени делови од телото.

Одредени јога пози ги „отвораат“ градите и ги прошируваат белите дробови, при што се подобрува протокот на воздухот, а во продолжение откријте некои од нив за кои вреди да одвоите време:

Кобра (Bhujangasana)

За да ја изведете оваа поза, легнете на стомак со рацете под рамената. Вдишете и подигнете ги градите од земја, држејќи ги лактите благо свиткани.

Фокусирајте се на отворање на градите со повлекување на рамената наназад и надолу.

Мост (Setu Bandhasana)

Легнете на грб, со свиткани колена и стапала во ширина на колковите. Вдишете, и подигнете ги колковите нагоре, потпирајќи се на стапалата.

Нека градите ви бидат отворени и затегнете ги мускулите на задникот за да ја задржите позата.

Камила (Ustrasana)

Клекнете на подлогата со колената раширени колку колковите. Наведнете се кон назад, ставете ги дланките на стапалата отворајќи ги градите нагоре, па дишете длабоко.

Риба (Matsyasana)

Легнете на грб и испружете ги рацете покрај телото.

Притиснете со подлактниците за да ги подигнете градите и горниот дел од грбот од подлогата. Свиткајте го грбот, дозволувајќи им на градите да се подигнат, како на фотографијата.

Тркало (Urdhva Dhanurasana)

Легнете на грб, свиткајте ги колената и поставете ги стапалата во ширина на колковите. Ставете ги рацете покрај главата, со прстите насочени кон рамената.

Подигнете се со помош на дланките и стапалата за да го подигнете целото тело и да добиете форма како на тркало.

Лак (Dhanurasana)

Легнете на стомак, свиткајте ги колената и испружете ги рацете наназад за да ги дофатите глуждовите. Вдишете, и подигнете ги нозете и градите од подот, како на фотографијата.

М. Ѓ | Црнобело