Едноставна вежба за сите кои сакаат убаво тело (а мразат да прават планк)

Оваа вежба е одлична и за оние што многу седат во текот на денот, но и за постари лица...

Една од најпознатите статички вежби за зацврстување на мускулите е планк (plank). Но, колку и да е ефикасна, оваа вежба им е меѓу најомразените на многумина.

За среќа, постојат и други вежби кои не бараат многу движење, а сепак ги активираат мускулите.

Дали некогаш сте ја пробале вежбата која помага да ја зголемите енергијата, ја исправува кичмата, го затегнува телото и ги зајакнува мускулите?

Оваа вежба ја подобрува и внатрешната работа на органите, респираторниот систем, но уште поважно - помага во процесот на слабеење и го подобрува тонусот на целото тело.

Но запомнете, самата вежба не е доволна - потребно е да внимавате на исхраната за побрз ефект.

За оваа вежба не ви треба посебна опрема, може да ја правите било каде и во кое било време.

Оптимално време за изведување е 10 до 15 минути, по пет минути со секоја од трите позиции колку што има вежбата. Со текот на времето, минутажата можете да ја продолжите.

Оваа вежба е одлична и за оние што многу седат, но и за постари лица...

Како да ја направите?

Вежбата има три позиции: раце поставени покрај телото, раце пред стомакот и раце во висина на градите.

Застанете исправено. Ставете ги стапалата паралелно во ширина на рамената. Држете ја главата исправена, рамената и градите опуштени.

Колената се благо свиткани и не треба да чувствувате никаков напор додека стоите. Гледајте напред, никогаш надолу.

Во првата положба рацете се спуштени, малку одвоени од телото, а дланките се паралелни со подот. Средниот прст од двете раце свртете го благо кон земјата. Стојте мирно.

Во втората положба, рацете ставете ги напред и нека бидат заоблени, како да држите голема топка пред стомакот. Останете во оваа позиција 5 минути.

Потоа, за третата положба, кренете ги рацете до висина на градите. Направете полукруг со нив (како да гушкате дрво), но раширете ги дланките. Цело време гледајте напред, никогаш надолу.

За цело време дишењето треба да биде рамномерно, а телото да ви е опуштено.

Важно е да се фокусирате на држењето на телото - не треба да се наведнувате, држете ја главата исправена.

На крајот од вежбата, полека исправете ги нозете додека вдишувате, кренете ги рацете со дланките нагоре.

Кога ќе ги донесете дланките во линија со вратот, свртете ги надолу и со издишување спуштете ги до нивото на стомакот.

А. Ј. | Црнобело