8 чести грешки на кои треба да обрнете внимание кога правите чучнувања за да ги избегнете повредите

Го искривувате грбот, не клекнувате доволно, ги кревате петите – сигурно правите барем една од овие грешки доколку сте почетник.

Чучнувањата се одлична вежба која ги активира не само мускулите на задникот, туку скоро сите мускули во долниот дел од телото.

Оваа вежба е омилена нa многумина бидејќи не бара никаква опрема и можете да ја правите буквално секаде.

Сепак, иако е едноставна за изведување, постојат мали грешки што ги прават повеќето почетници. Важно е да бидете свесни за овие грешки ако сакате да ги избегнете повредите.

Најчестите грешки на кои треба да обрнете внимание:

Ја правите вежбата само со колената

Кога ја правите вежбата, не треба тежината да ја префрлите на колената бидејќи со ова им создавате непотребен притисок.

Кога ќе застанете во почетната положба, префрлете ја тежината на колковите. Потоа свиткајте ги колената како да седнувате на стол, а кога станувате активирајте ги и мускулите на задникот и нозете. 

Колената ви се понапред од стапалата

Кога ќе клекнете, колената не треба да бидат понапред од стапалата. Со ова ризикувате да паднете нанапред.

Застанете цврсто на стапалата и додека клекнувате, осигурете се дека колената ќе ви бидат во линија со стапалата.

Го искривувате грбот

Кога ја правите оваа вежба мора да обрнете внимание и на горниот дел од телото. Не заборавајте дека грбот треба постојано да ви биде исправен.

Пред да клекнете, исправете го грбот и поставете ги рацете пред вас (како на илустрацијата десно) за да одржувате рамнотежа.

Додека клекнувате, држете го грбот исправен и немојте да го движите горниот дел од телото.

Ги поткренувате стапалата

Ако ги поткренете петите кога клекнувате, лесно можете да изгубите рамнотежа.

Целото стапало треба да ви стои на земјата додека ја правите вежбата.

Ги свртувате стапалата кон надвор

Ако ги свртите стапалата кон надвор додека ја правите вежбата, ќе создадете дополнителен притисок на колковите. Истовремено, ќе имате и проблеми со рамнотежата.

Стапалата треба да се свртени кон напред.

Не ги виткате колената под прав агол

Нема да постигнете никаков ефект ако само малку клекнувате со колената.

За да ги активирате мускулите, потрудете се да ги свиткате колената под прав агол.

Ги спојувате колената

Генерално, додека ја правите вежбата треба само да ги виткате колената, а не и да ги спојувате.

Колената треба да ви бидат во линија со стапалата додека клекнувате и се исправате.

Не го зголемувате интензитетот на вежбата

Ако со недели правите ист број повторувања и не го зголемувате интензитетот на вежбата, нема да постигнете многу.

Штом ќе сфатите дека чучнувањата ви стануваат лесни за правење и веќе не ги ни чувствувате, можете да додадете уште една серија повторувања.

Можете и да држите тегови во рацете, да ставите ластик околу нозете за поголем отпор… Онлајн лесно ќе најдете бројни варијации на вежбата со поголем интензитет.

Спирова С. | Црнобело