„Не, ова не е љубов - туку немоќта на еден беден маж, кој со ќотек наплаќа за тоа што бил оставен од жена“

„Да, и ова е љубов... Кога раскинувањето се плаќа со хематоми и трауми. Кога мисли дека тој ја создал и дека без него не би била ништо. Кога на своето его не може да му објасни дека таа повеќе не го сака. - Не, тоа не е љубов!“, пишува Стефан Симиќ, српски писател, кој споделува ситуација на негова пријателка.

Стефан Симиќ е српски писател, поет и социолог, роден во 1989 година во Параќин, Србија. Студирал социологија на Филозофскиот факултет во Белград.

Се прославил споделувајќи свои стихови и проза на социјалните мрежи, како и записи од секојдневниот живот, кои брзо станале популарни меѓу читателите.

Овој пат зборува за физичкото насилство врз жените и како тоа е симбол за немоќта на еден маж.

Раскажува случка за негова пријателка и иако не сме сигурни дали приказната е реална или само инспирирана од реалност, дефинитивно допира до срце и, за жал, некои ќе се пронајдат.

Неговата објава гласи:

„Да, и ова е љубов.
Кога маж од педесет години и 120 килограми не може да поднесе што девојка од дваесет и нешто го остава, па малку ја турка по скали, па малку ја шутира.

Да, и ова е љубов.
Кога најзгодната девојка што ја познавам, завршува со тип што ѝ ветува кули и градови, а потоа секој разговор за раскинување го плаќа со ќотек.

Да, и ова е љубов.
Кога раскинувањето се плаќа со хематоми и трауми.

Да, и ова е љубов.
Кога мисли дека тој ја создал и дека без него не би била ништо.

Кога на своето его не може да му објасни дека таа повеќе не го сака.

Кога не сака да ја пушти и ја прогонува.

Да, и ова е љубов.
Кога плаќа за сето добро што било.

Кога мора да се брани од ѕверски напади.

Кога мора да се крие, или да најми некого да ја заштити.

Не, ова не е љубов.
Ова е посесивност, омраза, одмазда.

Не, ова не е љубов.
Туку немоќта на еден беден човек, кој со ќотек наплаќа за тоа што бил оставен.

Не, ова не е љубов.
Ова се модриците на мојата другарка, која прва ми ги праќаше нивните заеднички фотографии, а сега ми ги праќа своите модринки.

Не, ова не е љубов.

Ова е животот.
Кога ќе западнеш во светот на еден психопат,
кој на почеток е најзаводлив на светот, кој има сè и може сè.
Фраер каков што нема.
Прв, единствен и најдобар,
а потоа се претвора во чудовиште.

Од кое мораш со сите сили да се браниш,
за да не те убие“.

- Стефан Симиќ

С. С. | Црнобело