Вечна тема - Постои ли пријателство меѓу маж и жена?

Верувате ли во машко – женски односи или тоа ви звучи подеднакво нереално како да сме спомнале вонземјани?

Дали е можно маж и жена да одржат само платонски однос или другарството кога – тогаш ќе помине во нешто повеќе? Ова е расправа која се провлекува подолго време, а решение нема!

Вистина е дека машко – женските пријателства се многу поретки од оние кои ги имаме со истиот пол. Можно ли е без разлика на тоа колку и да мислат двајца од спротивниот пол дека се пријатели, сепак меѓу нив да има макар и најмала доза на сексуална привлечност?

Логичен одговор на ова е дека пријател од спротивниот пол може да ни биде само некој кој воопшто физички не нè привлекува. Но, тука настанува нов проблем. Ако на сите други полиња функционираме одлично, многу е веројатно дека во еден момент истата таа личност ќе ни стане симпатична. Всушност, оние кои ги сакаме секогаш ни се најубави.

Има многу ситуации кога токму добри пријатели станале љубовен пар и имаат прекрасна приказна за раскажување. Има и такви кои пробале, па за сметка на кратка авантура го уништиле долго годишното пријателство, а има и такви кои навистина цел живот се само пријатели и нивната релација е слична на онаа помеѓу брат и сестра.

Значи, правила нема. Ако случајно имате пријател/пријателка кој ви се допаѓа, а мислите дека и другата страна се чувствува исто, занемарете го разумот. Некогаш најдобрите работи се случуваат кога ќе ги затвориме очите и ќе се препуштиме на моментот.

Ако имате некој кој навистина го цените и сакате само како пријател/пријателка, нека остане така, без разлика на светските анализи и статистики дека тоа не е можно. Некои работи кои не се објаснуваат лесно и кои не се мерат со бројки.

Па, свртете го телефонскиот број на пријателот или пријателката и напијте се едно кафе.