На светот му требаат силни и независни жени – како си поминав на уникатната модна ревија во Скопје?

Од Клара Цеткин, преку Малала Јусафзаи, до Грета Тунберг, светот секогаш имал силни жени со кои сите се гордеат. Тие ја менуваа историјата, а со своите животни приказни го отворија патот за идните генерации.

Ништо помалку импресивни не се ни македонските дами кои со години храбро чекорат напред. Слободни и независни жени кои не се плашат да ги земат работите во свои раце. Дами претприемачи со интересни и возбудливи идеи.

Е, токму тие дами доминираа на настанот „Фустани со џебови“ кој се одржа во хотелот „Хилтон“ на 24 март во организација на Халкбанк АД Скопје.

Кога тргнав на модната ревија која беше посветена на финансиската независност на жените, не знаев што да очекувам. И какви ќе бидат тие фустани со џебови?

За кратко сфатив дека џебот е всушност симбол на финансиската и економска самостојност на жените.

Уште на самиот влез знаев дека ова ќе биде едно поинакво и уникатно искуство. Прво, затоа што пет македонски креатори ги претставија своите впечатливи фустани. Второ, зашто веднаш по ревијата се одржа аукција на која се продадоа сите 11 парчиња, а парите ќе им бидат дадени на жени од социјално загрозени семејства.

Додека стоев отстрана со чаша вино, и гледав кој сè е во публиката на ревијата, сфатив дека сите жени во моја близина имаат успешна животна приказна.

Освен модните креаторки, кои низ годините создадоа име за себе и брендови за кои се зборува, во публиката препознав бизнис-жени, успешни модели, сопственички на мали бизниси, познати водителки, жени-претприемачи...

Во прекрасната атмосфера од насмеани лица и искрени разговори, се сетив на нешто што мајка ми ми го кажа одамна: „Никогаш не се извинувај за успехот што ќе го постигнеш во животот. Никој нема да ти го даде на тацна, самата ќе мора да се испотиш за сè. Ама, ќе биде сладок, а ти ќе одиш со високо крената глава“.

И некако, гледајќи наоколу, видов стотина жени со високо крената глава, кои веруваат во себе и тоа што го работат. Повеќе или помалку, сите тие вредно работеле да стигнат до нивото на кое се денес. Да постават стандарди. Да создадат име за себе. Да бидат препознатливи. И да бидат инспирација за другите.

А вакви инспиративни жени со позитивна енергија, кои сакаат да кажат нешто на глас, е вакви инспиративни жени ни требаат повеќе.

Дали додека го читате ова си викате – Па и јас сум една од нив! Јас можам! И сакам!

Всушност, на ревијата дознав дека сега тоа го можеме сите. А ако ни недостига малку храброст да почнеме да ги реализираме своите идеи, креативната кампања на Халкбанк „Вистински слободна“ нуди пакет производи за жени претприемачи, со кој ќе ја добиеме својата финансиска и економска самостојност.

На светот навистина му требаат силни жени што ќе се поддржуваат една со друга, кои ќе градат подобра иднина за своите деца, ќе сакаат и ќе бидат сакани и ќе бидат вистински лидери.

А. Ј. | Црнобело