Си заминала од Србија во 90-тите, омажена е за британски бизнисмен – Која е Роксанда Илинчиќ, српската дизајнерка што ги облекува славните?

„Кон крајот на 90-тите години немаше греење, па на факултет одев со шише топла вода за да се згреам, а потоа се запишав во Лондон“. Со овие зборови Роксанда Илинчиќ во една пригода го опиша животот во родната Србија пред да одлучи да си замине. Денес, таа е дизајнерка на богатите и славните, но како стасала дотаму?

Бијонсе во моментов е на музичка турнеја, а велат дека воопшто не штеди кога станува збор за облеката што ја носи на настапите. Таа неодамна се појави во син фустан од српската дизајнерка Роксанда Илинчиќ, која важи за една од најпознатите дизајнерки во светот.

Синиот фустан беше дел од колекцијата за есен/зима 2023-та година, а беше целосно адаптиран за телото на познатата пејачка.

Роксанда со години наназад е позната како дизајнерката на славните, а во продолжение прочитајте како успеала од студент по уметност во Белград, да ги оствари сопствените соништа во светот на модата:

Роксанда Илинчиќ е родена во 1977-та година во Белград и како дете често патувала со нејзините мајка и татко. Дипломирала на Академијата за уметност во Белград, на катедрата за применета уметност, а потоа магистрирала мода и дизајн во Лондон.

Рокаснда живее во Лондон од 1999-та година, а за одлуката да ја напушти својата родна земја и за периодот додека студирала во една пригода рече:

„Кон крајот на 90-тите години имав трауматични искуства, затоа што немаше греење на факултет, одев со шише топла вода за да се згреам додека седев и ги слушав предавањата. Наместо храна купував модни магазини и преку нив дознав и за факултетот Central Saint Martins каде подоцна се запишав“.

Иако живеела во тешки услови во тогашната татковина, Роксанда со гордост ги напоменува своите југословенски корени.

„Радосна сум кога се враќам со Србија, затоа што оттука потекнувам и горда сум на тој факт“ – рече во една пригода дизајнерката, која во родната земја била наградена со наградата „Витез на светисавскиот пацифизам“ за заслугите што ги дала кон зачувување на идентитетот на родната земја.

Набрзо по доаѓањето во Лондон, таму го запознала сегашниот сопруг Филип Буено де Мескита. Една година по запознавањето тие двајца се венчале, а 10 години подоцна ја добиле ќерката Ефимија Ранка, која ја викаат нагалено Мија.

Во една пригода Роксанда рече дека за секоја годишнина од бракот, сопругот ѝ купува по еден винтиџ прстен.

Филип е сопственик на спортскиот бренд Acupuncture, a освен што ѝ е животен сопатник, тој истовремено ѝ е и многу важен бизнис соработник.

Додека студирала, Роксанда работела како модел, а вели дека тоа дополнително ѝ помогнало во работата.

Во 2002-ра година ја започнува својата кариера како моден креатор, а во последните 20-тина години успеа да изгради бренд препознатлив низ целиот свет.

Модната креаторка е позната по тоа што долги години наназад беше задолжена за изгледот на принцезата Кејт, а во нејзини аутфити се појавиле повеќе влијателни сопруги на политичари: Мишел Обама, Меланија Трамп, Саманта Камерон...

Кејт Бланшет, Џесика Алба, Селена Гомез, Блејк Лајвли се само дел од другите славни дами што досега се појавиле во креации на познатата српска модна дизајнерка.

Прочитајте и Омилената српска дизајнерка на Кејт Мидлтон, Мишел Обама, Меланија Трамп - Роксанда Илинчиќ

Б. С. Б. | Црнобело