Легални ли се белите чорапи?!

Кој ги сака кој не. За белите чорапи се водеа сериозни расправи во светот на модата, но никако да завршат на пописот на забранети модни додатоци.

 

 

Постојат неколку причини зошто не би требало да се носат белите чорапи, велат дизајнерите.

Прво, не се сложуваат со ништо (освен ако не се облечете целосно во бело и ги сокриете со долги ногавици), лесно се валкаат па не е пожелно да ги соблекувате патиките или сандалите, а ако баш морате да ги облечете, имајте на ум да се искомбинираат со спортска облека.

Меѓутоа и покрај овие совети и забелешки, ние се уште си ги носиме белите чорапчиња.

Во Холандија во 2004, власта сакала да ги прогласи белите чорапи за непристојни. Откако веста била пренесена во светските медиуми, и почнало да се коментира за идеите во либерална Холандија, власта објавила дека сето тоа било речено во контекст на кодексот за облекување кој треба да се почитува.

Така, холандските бели чорапи “преживеале“, но станало јасно дека “црно им се пишува“.

Белите чорапи се дел од спортската облека. Не се знае кој и кога ги прошетал и вклопил во секојдневниот стил и дури и во елегантни комбинации.

Едно е сигурно - тие биле и се дел од стилот на голем број ѕвезди. Заштитен знак на Мајкл Џексон, момците од машкиот бенд New Kids On The Block, Gene Kelly.

На светските плажи често во комбинација со сандали може да видите како ги носат Џастин Тимберлејк и Еминем, кои тврдат дека им е најважна удобноста, а потоа се останато.

Сепак на оној кој сака да ги носи сигурно не му значи мислењето на модните креатори или на Холанѓаните.

Што мислите вие?