Елеганција и боемство: Првиот ден од Модниот Викенд во Скопје

13-тиот Моден Викенд и официјално беше отворен вчера под мотото „Да живеат 80-тите!“ . Елеганција, префинетост, боем и уметнички дела се само неколку од епитетите кои совршено ја опишуваат првата вечер од FWSK.

Своите колекции за претстојните пролет/лето 2016/17 ги претставија добро познатите Росица Мршиќ, Олгица Ѓоргиева и ателјето „Алшар“ односно Силвана Михајловска.

Според овие 3 дизајнерки, црната, белата и црвената боја ќе бидат најзастапени оваа сезона, од материјалите памукот – како еден од најпријатните летни материјали во кој кожата може слободно да дише, надополнет со парчиња изработени од свила, кулотите ќе бидат особено хит на сезоната, а голиот грб ќе биде задолжителен на секој фустан и блуза.

 

Росица Мршиќ

Кратка, но богата и инспиративна, ревијата на Росица Мршиќ е приказна за себе. Кога би можеле да ја опишеме целата колекција со два збора тогаш тие би биле „префинета елеганција“. 

Како елен кој плени со својата убавина, а сепак крие од погледите на јавноста, визијата на Мршиќ е моќна, но со елементи на нежност и изразен феминизам.

Минималистички парчиња од лелеави материјали, чисти силуети со строги кроеви и изрези на грбот – ова се неколку карактеристики од парчињата за сезоната која следи. 

 

Олгица Ѓоргиева

Црвената боја надополнета со богат принт е првото нешто што се забележува кај Олгица Ѓорѓиева. На моменти потсетувајќи на Медитеранот поточно на Франција и Италија, секое парче само од себе асоцира на лето и на топла клима.

Весела и разиграна, по малку можеби и боемска, жената на Олгица Ѓоргиева ужива во животот. Дневните фустани за прошетка, бомбер јакната и кулотите се совршен пример за тоа како би требало да изгледате средено, но сепак лежерно.

Освен црвената, исто така доминира и белата, а се појавува и богата смарагдна боја. Од материјалите жоржетот и памукот се најзастапени.

 

Силвија Михајловска – ателје Алшар

Насловена како „Sakura infusion“ колекцијата на Силвана Михајловска изобилуваше со детали од јапонската култура, а дури и манекенките наликуваа на гејши.

Освен јапонската, може да се рече дека постоеја и елементи од шпанската фламенко танчарка, поточно од нејзиниот фустан. Со единствена разлика што, овде наборите се во горниот дел на телото.

Третиот дел од ревијата вклучуваше парчиња кои наликуваа на уметнички дела од Џексон Полок надополнети со разни ремени поставени дијагонално, или масивни црни копчиња кои му даваат шарм на секое нејзино парче.

Софија Сионова | Црнобело

Фото: Ани и Дими