Црвените чевли низ историјата: Денес тие испраќаат помоќна порака од кога било

Во 1939 година, Дороти тропкаше со своите црвени чевлички велејќи „не постои место како дома“, а оттогаш многу генерации на жени израснаа знаејќи ја моќта на црвените чевли.

Но покрај филмот „Тhe Wizard of Oz“, кај жените што носат црвени чевли, нешто автоматски испраќа порака за моќ и независност до светот.

И во историјата црвените чевли биле главно обележје на храбри индивидуи. Во 1701 Кралот Луи XIV позирал за кралскиот портрет во црвени чевли со потпетица.

Во тоа време било навистина тешко и скапо да се дојде до нив, па всушност требало да бидеш крал за да можеш да си ги дозволиш или барем Папа, кои исто така носеле црвени кожени чевли од 1484 сè додека Папата Францис не ги заменил со покомфорни кафени ортопедски чевли.

Технички во минатото црвените чевли биле симбол за мажи со моќни позиции, па кога една жена се обидувала да присвои традиционално машки симбол за моќ била оценувана како непристојна.

Потоа со текот на времето чевлите полека стануваат симбол за ослободувањето на желбите на жените и тие започнуваат сѐ почесто да ги носат.

Црвената боја ја поврзуваме со страста, со крвта. Таа е импулсивна, експлозивна, храбра, па не е ниту чудно што доминира на толку многу есенски ревии.

Дизајнерите знаат дека ние се облекуваме како реакција на надворешниот свет и со оглед на зголемената нестабилност во политичката и економската сфера во светот, очигледно е дека му пристапуваме на облекувањето наутро како на ставање на штит.

Црвената значи отпор. Сега носењето на црвени чевли, особено црвени чизми, е еквивалент за врескање „Јас сум жена, слушнете го моето ‘ржење“.

Можеби моделите што ни ги прикажаа на модните ревии Givenchy, Giambattista Valli или Oscar de la Renta, не се најпрактични за секој ден, но дефинитивно зрачат со енергија каква што може само пар огнено црвени чизми да обезбеди.

Кога изгледа дека светот го гаси вашиот оган, тогаш протестирајте со облекување пар црвени чевли и газете напред самоуверено и цврсто.

Следете го вашиот пат до местото каде ќе се чувствувате како дома.

С. С. | Црнобело