Oтмено и дамски: Како да се облечете за свечените прослави на работа?

Декември е во знакот на предновогодишните забави со шефовите и колегите. Ви се чини како вистинско време да блеснете во полн сјај? Не претерувајте – тоа може да биде меч со две острици.

Жените редовно се двоумат околу изборот на гардеробата за свечените прослави на работа, во желбата да изгледаат убаво, а сепак да не „претераат“ со дотерувањето.

На крајот на краиштата, која дама сака половина од вработените да зјапаат во нејзиното деколте, а сопругата на директорот да ѝ дофрли дека здолништето ѝ е прекратко?

Ако вашето работно место е во некоја посериозна организација, избегнувајте ја облеката што би ја носеле на журка со дечкото или пријателките. Заборавете на прекратките мини здолништа, особено во комбинација со чизми кои ви досегаат до бутините.

Длабокото деколте во стилот на Џеј Ло исто така не е опција, како и хеланките со краток топ, којшто не ви го прекрива задникот. Голиот грб е секси, ама не е за оваа пригода.

Претерувајќи со крзно, чипка и циркони нема да воодушевите никого, а леопардски или тигрест принт од глава до пети е апсолутен кич и невкус. Претесната облека, која изгледа како да ќе пукне на вас, пак, не е соодветна за ниту една прилика.

Од друга страна, секогаш може да се одлучите за елегантен фустан, панталони во комбинација со свилен топ и блејзер, здолниште во тандем со префинета блуза или маичка, како и комбинезон. Накусо, секое парче што освен вашиот добар вкус, нема да им открие премногу на другите.

Најважно е да изгледате уредно и софистицирано, но и да се чувствувате добро во своја кожа. Па, доколку немате идеи, ви нудиме неколку шармантни предлози како инспирација:

1. Широкото миди здолниште е полн погодок, а може да се вклопи со кошула, топ, ролка или блуза. Одберете го тоа што вам најдобро ви прилега.

2. Ако се одлучите за светки, комбинирајте ги со едноставни и елегантни парчиња.

3. Дoколку имате убави нозе и витки колкови, кадифените панталони може да ви бидат главeн адут за празничните забави.

4. Сите лудуваат и по префинетите фустани од плиш – па нема причина да не ги испробате и вие.

5. И популарниот фустан-сако доаѓа предвид, под услов да не ви е прекраток, копчињата да се добро прицврстени, а под него да не бидете сосема голи.

6. Комбинезонот со занимлив дезен ќе ве претвори во кралица на забавата и добриот вкус.

7. Дамските фустани со голи раменици, а долги ракави, пак, секогаш се одлична идеја, особено тие со класичен крој и ѕвонести завршетоци.

М. А. | Црнобело