Розови нијанси, диско естетика: 7 клучни машки модни трендови за лето 2022 година

Машката мода веќе одамна не е здодевна, а границите се поместуваат од година во година. На пистите за пролет/лето 2022 година беа прикажани модели и кроеви кои означија разиграно менување на „досадната“ и тешка зимска облека. Смели деколтеа, разновидност и опуштен стил се само три од повеќето клучни зборови кои ги опишуваат трендовите на оваа сезона.

Она што можеме да го споменеме како додаток е одлуката на дизајнерите да ги „зачинат“ своите колекции со мотиви на славење, во име на можното конечно ослободување на светот по две тешки години кои се зад нас.

Затоа, оваа година ќе видиме уште повеќе живи бои, како и облека погодна за забава и прослави.

Минатото лето изобилуваше со комбинации во послободни бои, а кои парчиња и нијанси ќе бидат модерни за носење во текот на летната сезона оваа година?

Машки дуксери 

Повеќето дизајнери се решени никогаш да не ја исфрлат најголемата класика на сите времиња од нивните колекции, без разлика колку модата се менува и се разликува од година во година, а тоа е квалитетниот машки дуксер.

Модерните дуксери за мажи со и без качулка засекогаш ќе останат моден хит и нешто со што нема да погрешите. Доколку не сакате да експериментирате и сакате безбедно да „пливате“, со ова безвременско парче облека ќе бидете „ин“ засекогаш!

Розова боја

Многу познати личности веќе ги наполнија своите плакари со различни нијанси на оваа боја. Нијансите кои се најпопуларни се дефинитивно валкано розова, лосос боја и многу светло розова.

Побрзајте да земете неколку розови парчиња, со оглед на фактот дека оваа боја ќе биде на врвот на топ листата на најпопуларни за оваа година!

Маици со поширок крој во кои полесно се „дише“

Благодарение на глобалното затоплување, секоја нова година се запознаваме со зголемените летни температури. Затоа дизајнерите ни излегоа пресрет со претставување на пошироки, лелеави маици погодни за вакви временски услови.

Зелена боја 

Зелената ја претставува природата и е одраз на слободата. Таа станува се поактуелна токму затоа што несомнено е една од најразновидните бои што може да се прилагоди на повеќето стилови.

Ако некој е љубител на монохроматска облека - зелената дефинитивно треба да биде неговиот избор.

Диско естетика

Бидејќи во последните две години немавме многу можности да одиме во клубови, нашите плакари заборавија како изгледа облеката што не служи за спиење и домашно „блеење“. 

Па, дизајнерите решија да застанат на патот на тоа така што дизајнираа цели колекции парчиња за забава. Нè очекуваат многу светли и смели маици, многу кошули со светки и сјајни металик панталони. Во превод - сè што е сјајно влегува во игра.

Летен кардиган 

Многу долго време, кардиганите се сметаа повеќе за практично, отколку модерно парче на облека.

Сепак, времињата се менуваат, а оваа стара слика на кардигани падна во заборав. Веќе во текот на изминатата година станаа невидено посакувани, а оваа зима го достигнаа врвот на популарноста. 

Затоа, дизајнерите одлучија да дизајнираат малку потенки верзии на овие интересни додатоци за облека и за пролетните и за летните колекции. Во моментов нема славна личност или инфлуенсер кој не поседува барем едно такво парче.

Летни шорцеви

Toтално неизбежен летен детаљ. Ленени, тексасни, платнени, еднобојни или шарени - тие се парче кое во никој случај не излегува од мода и мажите го обожаваат.

Мила М. | Црнобело