Ќе ве качиме во „кајчето на Лихнида“ и ќе ве одведеме до петте најубави локации во нашиот бисер Охрид

Рибарите ги прибираа мрежите. А езерото мирно, душа да си одмориш. И додека убавата Билјана го белеше своето платно, сончевите зраци тивко газеа по калдрмите на стариот Охрид. Зарем треба уште да го опишуваме местото каде природата ја истурила сета своја раскош?

Тука сме ние да ве качиме во кајчето на Лихнида и да ве одведеме до петте најубави локации во преубавиот Охрид, кои се вистинска атракција за многу туристи.

Неколку скриени ќошеви во Охрид - цут на фантазијата, надреалноста, природната уметност и божјата убавина:

Заум

Заум е место близу селото Трпејца кое е надвор од реалноста.

Големо крајбрежје на кое е сместена црквата Св. Богородица Заумска... Запаметено како најубавото место за кампување во минатото.

Јас го знам уште кога мојата баба ми раскажуваше како во младоста оделе таму да кампуваат.

Сараиште

Доколку сакате да се бањате на местото каде се бањала најпознатата охридска фамилија – Робевци, тогаш ова место е измислено само за вас.

Најпозната градска плажа сместена во стариот дел на Охрид. Плажа со историско значење бидејќи таа била местото каде се собирале најпознатите рибари од Охрид.

Лабино

Уште едно скришно место за одмор. Дива плажа карактеристична по тишината која изобилува таму.

Плажа сместена во прегратките на карпите. Големите сенки од дрвјата, чистата вода, како и бесценетиот поглед го прават местото посебно за уживање и релаксација.

Горно Коњско

Доколку сакате да го видите целото Охридско Езеро со еден поглед, тогаш селото Горно Коњско е најдоброто скриено ќоше за вас.

Ова место посебно го прават големиот број на вили каде можете да преноќите, како и рестораните со вкусната традиционална храна.

Самуилова тврдина

Ако сте љубители на историјата, тогаш Самуиловата тврдина е одлично место за да се присетите на кралското минато на Македонија.

Погледот кон езерото кое го одзема здивот и уникатната древна градба, ова место го прават да биде една од најомилените локации за фотосесија на туристите.

©CRNOBELO.com Забрането преземање и копирање. Крадењето на авторски текстови е казниво со закон.

А. Б. | Црнобело