Бонтон правила со кои ќе делувате како културен гостин во хотел

Немојте да валкате куп крпи за еден ден и ако чекате чистачка, барем соберете си ја валканата облека.

Точно е дека кога сме во хотел не мора да се грижиме за менување постелнина, перење крпи, готвење и слично.

Но, ова не значи дека треба да се однесуваме разгалено, како вработените во хотелот да ни се слуги.

Треба да покажете доза почит кон вработените, особено хигиеничарките, ако сакате да делувате како културна личност и да оставите добар впечаток.

Бонтон правила што ќе ви помогнат во ова:

Бидете внимателни со крпите

Една крпа за лице може да ви послужи барем два дена. Исто е и со крпите за туширање. Па, немојте да ги фрлате на подот по само една употреба.

Исто така, немојте да ги користите крпите за да отстраните шминка бидејќи на нив ќе останат дамки, па ќе му направите дополнителен трошок на хотелот, но и ќе им отворите повеќе работа на одговорните за хигиената.

Не ја оставајте собата во хаос

Од вас не се очекува да ја исчистите собата пред да си заминете, но исто така не е во ред и да оставите хаос. Ако очекувате да дојде чистачка, можете барем да си ја соберете облеката, особено валканата.

Пред да го напуштите хотелот, потрудете се да ги ставите валканите крпи на купче и да го соберете вашето ѓубре. Не мора да го изнесувате надвор, но барем соберете сè во корпата за отпадоци.

Не пуштајте гласна музика, телевизија и слично

Во хотелот не сте сами и секогаш треба да ги имате предвид другите гости. Избегнувајте да пуштате гласна музика, дури и во текот на денот бидејќи може некој спие.

Никако немојте да пуштате музика на терасата, од каде што можат да ве слушнат сите.

Замислете како би се чувствувале вие кога сакате да одморите во хотел, но од некоја соба „ечи“ музика или телевизор.

Не барајте да ви ја чистат собата секој ден

Точно е дека сте во хотел, но сигурно не ви треба чистачка секој ден – можете и сами да си го наместите креветот и да си ја соберете расфрланата облека.

Не оставајте недојадена храна во собата

Ако јадете во собата, секогаш фрлајте ги остатоците пред да излезете. Ако, пак, нарачате од хотелот, тогаш викнете собна послуга кога ќе завршите.

Со ова ќе им ја олесните работата на хигиеничарките во собата, но и во кујната на хотелот.

Исто така, никогаш не оставајте остатоци од нарачаната храна во ходникот – хигиеничарите не парадираат постојано и нема да можат да ја соберат веднаш, па ќе почне да се шири мирис, но и бактерии во ходникот.

Спирова С. | Црнобело