Топ 5 најубави плажи на Макарска ривиера во Хрватска

Макарска повторно станува популарна дестинација кај младите, но и кај семејствата со деца - предлагаме 5 прекрасни плажи, кои се едни од најубавите на Макарска ривиера - од диви и скриени, до популарни и со барови, а секаде водата е кристално чиста и тиркизна. 

Во близина на градот Макарска, се наоѓаат неколку крајбрежни туристички местенца, како Брела, Башка Вода, Играна или Тучепа, кои вреди да се посетат ако сакате мир, оаза, тиркизна и кристално чиста вода.

Долгиот брег на Макарска ривиера нуди неколку прекрасни плажи, кои важат за едни од најубавите во Хрватска.

Можеби овој дел не е толку популарен како островите, но сепак многу Македонци периодов летуваат токму тука и уживаат во убавините на оваа ривиера.

Доколку се двоумите, во продолжение неколку плажи на Макарска ривиера кои ќе ве натераат да ги посетите:

Плажа Нугал

Совршена подзаскриена плажа со убавина која вреди да се доживее, но за таа цел потребна е прошетка низ шума од околу 30 минути, па пожелно е да понесете патики.

Станува збор за дива плажа под карпи која се наоѓа помеѓу Макарска и Тучепа, каде ќе уживате во слободата и прекрасниот пејзаж со тиркизното море.

Плажа Макарска

Ова е главната градска плажа, за сите оние кои сакаат пожива и динамична атмосфера, со повеќе гужва, но и многу активности – од парасејлинг до сурфање на ветер, како и бројни барови и ресторани.

Плажа Пунта Рата

Оваа плажа се наоѓа во местото Брела, има ситни камчиња, но песочен влез во море, а брегот го красат високи борови кои помагаат за природна ладовина и совршено бегство од сонце.

Тиркизната вода ја прави идеална, неколкупати има добиено награди, има организиран дел со лежалки и барови, а препознатлива е по округлата карпа во морето.

Плажа Николина

На 10-тина километри од Макарска се наоѓа една од популарните плажи на оваа ривиера, која е сместена во срцето на Башка Вода.

Морето е кристално чисто, со азурна боја, плажата е опкружена со зеленило и природна сенка, околината нуди многу активности, шармантни кафулиња и ресторани, како и лежалки.

Освен тоа, плажата Николина гордо го носи синото знаме, симбол на беспрекорно чисто и квалитетно море.

Плажа Велика Дуба

Уште една плажа скриена помеѓу густа шума и карпи, во близина на Макарска, каде нема фенси бич барови, но има вистински мир, пејзажи кои не се опишуваат со зборови и кристално чисто тиркизно море.

Локалците уште ја нарекуваат и „Дубаи плажа“, а изгледа како да е од разгледница.

М. М. | Црнобело