Убавините на Шпанија покрај Барселона: Лорет де Мар и Санта Сузана

Шпанија е земја која има прекрасни градови и неверојатни места кои вреди да се посетат. Барселона е помеѓу најчесто посетуваните дестинации, но покрај овој град од соништата има уште неколку места кои се наоѓаат на брегот на Каталонија.

Брегот на Коста Брава се наоѓа на територијата на Каталонија, а се простира од местото Бланес до границата со Франција. Познат е по стрмниот релјеф, бројните заливи и рибарски селца.

Коста Брава во превод значи Див брег, а во овој дел припаѓа и познатото туристичко место Лорет де Мар.

Сите плажи во Коста Брава се песочни и широки, па така има место за сите туристи. Денот трае долго и можете да уживате до подоцна во звукот на морето.

Покрај Коста Брава, на брегот на Каталонија се наоѓа и Коста дел Маресме, каде што всушност припаѓа прекрасното туристичко место Санта Сузана.

Исто како во Коста Брава и овде има големи плажи на кои може да уживаат семејства и друштва кои може да се забавуваат со бројните активности кои ги нудат тие.

И во Коста Брава и во Коста дел Маресме има уште многу други места на кои може да прошетате, но сега се фокусираме на Лорет де Мар и Санта Сузана.

Лорет де Мар

Најпознато туристичко место во Коста Брава со премногу хотели, продавници, ресторани, кафулиња, прекрасни плажи и улици исполнети со „реки“ од туристи.

Бои, вкусови, мириси, музика се дел од работите во кои уживаат околу 1.5 милиони туристи кои секоја година го посетуваат ова место.

Сепак, тоа што младите најмногу ги привлекува е богатиот ноќен живот со дискотеки и барови кои работат во полна пареа.

Меѓу локалните знаменитости се наоѓа капелата изградена во модернистички стил во центарот на градот во чија околина се наоѓа и старата каталонска готичка црква од 16-ти век. На шеталиштето се наоѓа и Музејот на морето (Museo del Mar) кој претставува значајни моменти од поморската историја на ова место.

Санта Сузана

Поради близината, многумина мислат дека Санта Сузана исто така припаѓа на Коста Брава, но тоа не е точно. Ова прекрасно место кое е дел од Коста дел Маресме, се наоѓа на 60 км од Барселона, нуди 2 километри широки плажи со чист златен песок, борова шума и многу водени спортски активности.

Овде ќе најдете голем избор на ресторани со локална и интернационална кујна, а во ноќниот живот може да уживаат младите друштва, паровите, па дури и за семејствата има по некоја занимливост.

Стариот град се одликува со тесни улички и историски згради и споменици, а движејќи се кон морето ќе почувствувате како да сте се транспортирале во модерна околина со богати ресторани, продавници и спортски објекти.

М. М. | Црнобело