Како да имате пријатен и безбеден престој во различни земји низ светот?

Сите знаеме дека пред да отидеме некаде надвор од земјата треба да направиме неколку работи.

Да имаме патничко осигурување, да направиме фотокопија од пасошот и личните документи, да носиме лекови и мал несесер со средства за прва помош и слично.

Во некои земји во светот ова не е доволно за да бидеме безбедни и постојат разни опасности кои би можеле да ни го расипат престојот и да предизвикаат непријатни ситуации.

За да го направите престојот во странство попријатен и безбеден, внимавајте на следниве работи:

Мексико

Ако патувате во Мексико, задолжително ќе ги посетите прекрасните плажи и ќе пробате оригинална мексиканска текила.

Но, внимавајте на следново:

Во Мексико има 280 видови на скорпии, а дел од нив се отровни. Внимавајте каде одите и каде газите.

Лицата во алкохолизирана состојба на улиците низ Мексико се казнуваат и може да одат во затвор.

Водата во Мексико не се пие. Купете си флаширана вода.

Оваа земја има висока стапка на криминал, па бидете посебно внимателни кога шетате низ улиците, седите на плажа или вадите пари од банкомат. Никако не се шетајте сами навечер.

Ако престојувате во Мексико, подложни сте на ризик да заболете од некоја заразна болест, како на пример маларија.

Турција

Турција е една од најпопуларните земји за туристите.

Но, и тука постојат опасности:

На места кои не се туристички дестинации, жените не смеат да шетаат сами, без придружба. Жените треба и да избегнуваат да шетаат сами навечер и да носат облека која открива делови од телото.

Традиционалните турски тоалети на шолјата имаат додаток за миење на интимните делови. Се случува во тоалетите да нема тоалетна хартија, па носете си хартиени марамчиња со вас.

Индија

Сите историски знаменитости низ уникатната Индија сигурно ќе ве воодушеват. Тука се наоѓа прекрасниот Таџ Махал. Но, не е сè како што изгледа на фотографиите.

Во Индија е многу лесно да се заразите со некоја болест или инфекција. Пијте само флаширана вода од познати брендови. Добро би било и да се вакцинирате пред да отпатувате таму.

Жените треба да ги почитуваат строгите правила на облекување и да не носат провокативна облека, особено во делови кои се помалку познати за туристите.

Колумбија

Колумбија е шарена и живописна земја во која има што да се види.

Сепак, и тука постојат правила и опасности, како на пример:

Стапката на криминал во Колумбија е една од највисоките во светот. Бидете посебно внимателни за ова. На туристите им се препорачува да викаат такси од рецепцијата на хотелот, а не од улица.

Во водните површини во Колумбија живеат опасни животни како што се ајкули, пирани и отровни жаби. Прашајте некој од локалното население на кои плажи смее да се бањате.

Египет

Постојат многу причини да го посетите Египет. Пирамидите се секако една од нив.

Но, внимавајте на следново:

Не пливајте во реките поради опасност да се заразите од бактерии. Пливајте во море или во базен со прочистена вода.  

Во коралните гребени на Црвеното Море се кријат морски ѕвезди кои имаат отровни иглички на нив. Ако се боцнете на нив, местото ќе се вцрвени и може да дојде до несвестица. Исчистете го убодот, ставете антисептик и одете на лекар.

Во Египет може да се заразите со разни болести, меѓу кои Хепатит А и Б. Примете ги потребните вакцини пред да отпатувате.

Египет е муслиманска земја, па и тука важат правилата да не се носи облека која открива делови од телото.

Тунис

Во Тунис има прекрасни плажи, историски градби и спа-центри.

Но, и таму не е сè толку совршено:

Во Тунис често има граѓански протести и маршови. Ако видите дека има таков настан, стојте подалеку од гужвата.

Во Тунис има строги забрани за фотографирање споменици и историски знаменитости. Пред да направите фотки, консултирајте се со локалните власти.

Ако пливате во морето во август, има големи шанси да налетате на медузи, па внимавајте да не ве опечат, а ако се случи тоа, веднаш посетете доктор.

Пред да одите во Тунис, вакцинирајте се со сите потребни вакцини.

Јужна Африка

Јужна Африка нуди уникатни искуства за сите туристи.

Повеќето од нив се пријатни, но може да начекате и непријатни изненадувања:

Стапката на криминал е висока, па внимавајте на кражби, особено навечер. Заклучете го автомобилот и затворете ги прозорците внатре.

Во Јужна Африка се вози на левата страна од коловозот, па ова е корисно да го знаете и ако сте возач, и ако сте пешак.

Пушењето на јавно место е забрането и се казнува. Пушете само на местата на кои има натпис дека е дозволено.

Во Јужна Африка живеат едни од најопасните животни во светот. Внимавајте ако одите на некое патување каде има животни и пливајте само во дозволените делови заштитени со мрежа.

И за во Јужна Африка треба да се вакцинирате, па консултирајте се со лекар пред да заминете.

Етиопија

И во Етиопија има што да се види. Во главниот град има споменик на поетот Пушкин, а постојат и интересни музеи кои вреди да се посетат.

Ако некогаш одите во оваа земја, еве на што треба да внимавате:

Избегнувајте ги местата близу границите со Судан, Сомалија, Кенија и Еритреја. Во минатото често се случувало да има немири, а понекогаш и да се киднапираат луѓе.

Дождовите во Етиопија траат од април до септември. Проверете го времето пред да отпатувате за да бидете подготвени.

Во Етиопија има строги правила што смеете, а што не смеете да фотографирате. Побарајте дозвола од локалните власти претходно.

Етиопија е земја во која има разни заразни болести, па вакцинацијата пред да тргнете е задолжителна.

Нигерија

Нигерија е позната по шарените пазари и панаѓури и езерото Чад.

Но, и во оваа земја постојат ризици и опасности:

Често се случува туристи да бидат киднапирани во Нигерија. Не се шетајте сами и не се оддалечувајте од хотелот и местата што се попознати.

Змиите, крокодилите и нилските коњи исто така претставуваат опасност за туристите. Внимавајте каде одите и не им се приближувајте на животните.

Избегнувајте да газите боси по песокот на плажа или да ја сушите водената облека надвор. Одредени видови на инсекти во Нигерија се отровни и можат да положат јајца во облеката или да ви влезат во кожата.

М. В. | Црнобело