7 светилници на Јадранското крајбрежје во коишто може да престојувате ова лето

Доколку сакате ова лето да го поминете во романтичен одмор далеку од градската бучава и да уживате во морето, сонцето и прекрасниот поглед, тогаш треба да размислите за летување и престој во некој од светилниците на Јадранското крајбрежје.

Поголемиот дел од светилниците имаат и големи тераси на коишто ќе можете да уживате додека читате и го пиете вашиот омилен пијалак, како и приватни плажи на коишто ќе можете безгрижно да се сончате или да си направите забава со вашите најблиски.

Погледнете ги најубавите светилници по брегот на Јадранското Море кои може да се изнајмат за престој ова лето:

Коромачно, Лабин

Овој светилник има голема тераса, неверојатен поглед, приватна плажа на само десет метри од него, камена куќа за престој и модерно уреден простор, доволно голем за дружење или одмор за 8 души.

Гребени, Дубровник

Изграден во 1872 година, овој светилник е сместен на островот Гребени којшто се наоѓа во близина на Дубровник и е вистинска оаза на мирот, односно место за уживање во сонцето и синото море. Прекрасната тераса за сончање и приватната плажа се причина зошто многумина ја бираат оваа локација за одмор.

Медулин

Ова е романтично и луксузно место кое нуди малку поразличен летен одмор. Се наоѓа на 25 метри од морето, сместен е далеку од погледите на љубопитните минувачи и нуди многу дополнителни содржини за своите гости.

Хвар

Прекрасната природа, прекрасната градина и убаво уредениот простор за 8 луѓе се одлична причина да посакате да го посетите островот Хвар и да уживате во авантуристичкиот одмор.

Островот Вела Сестрица

На овој светилник, навистина ќе добиете впечаток како да се наоѓате во книгата Робинзон Крусо, најмногу затоа што самата положба и изгледот на светилникот потсетуваат на авантура која се одвива на пуст остров. Светилникот е изграден во 1876 година и има поглед кон Корнати и кон отвореното море.

Корчула

Светилникот сместен на Корчула е преуреден во вистинска оаза на мирот во којашто ќе можете да уживате како во надворешниот базен со џакузи, така и во надворешната трпезарија, па и во возењето со брод или џет-ски.

Макарска

Светилникот Св. Петар се наоѓа на самиот влез во Макарска и е опкружен со камена тераса. Оддалечен е од морето само десетина метри, а обиколен е со прекрасен полуостров, кристално бистро море, зелени оази со дрвја во заднината и прекрасни плажи.

(О)Милена | Црнобело