Волшебни библиотеки кои се туристички атракции за љубители на книги и патувања

Доколку сакате патувања и книги, тогаш погледнете каде можете да заминете и да уживате во автентичните градски библиотеки, во кои ќе сакате да останете колку е можно подолго.

Ова е краток пат околу библиотеките низ светот, на вас е да одберете каде би заминале.

Тијанџин Бинаи - Кина

Спектакуларна библиотека која не личи на ниту една досега видена. Доколку Кина е на вашата мапа за патување, посетете ја оваа едноставно прекрасна библиотека, која се протега на површина од 33.800 метри квадратни, со брановидни полици преполни со книги.

Оваа библиотека има и осветлени сферни простории, наликува на пештера и е уживање за сите сетила, особено на страсните читатели, но и оние кои сакаат убаво уреден простор.

Библиотеката во Адмонт - Австрија

Ова е најголемата манастирска библиотека во светот. Се наоѓа во градот Адмонт и содржи над 200.000 наслови поврзани со уметноста и културата низ вековите.

Таму се чуваат заштитени 900 примероци од најстарите печатени книги, но и околу 70.000 ракописи, поставени на полици во централниот дел. Дневната светлина влегува низ 48 големи прозорци, симбол на просветителските идеи.

Библиотеката во Виблинген - Германија

Величествена сала во која се чуваат стари и многу вредни ракописи. Ентериерот на библиотеката е еден од најубавите примери на уметничкиот рококо стил.

Надворешната фасада е правена да изгледа како Царската библиотека од Виена, за да се нагласи поврзаноста на Виблинген со кралската лоза.

Заедно со фреските и статуите, библиотеката во Виблинген претставува значајно културно, архитектонско и уметничко наследство на Германија.

Португалската кралска библиотека - Бразил

Оваа библиотека се градела во периодот меѓу 1880 и 1887 година, во Рио де Жанеиро. Денеска, таа ја содржи најголемата колекција на вредни португалски дела надвор од Португалија.

Може да се најдат повеќе од 350.000 наслови, меѓу кои има и оригинални записи на големи португалски литературни дела.

Секоја година библиотеката се збогатува со околу 6.000 наслови и се очекува наскоро книжевниот фонд да достигне бројка од 400.000 книги. Освен книги, таму има и бројни уметнички дела значајни за португалската историја.

Рингишпил на светлината (Cărturești Carusel) - Романија

Импресивна зграда сместена во Букурешт, која е обновена и во нејзе е сместена најголемата библиотека во Романија. Името во превод значи „рингишпил на светлината“. Библиотеката има шест ката и располага со над 10.000 книги од најразлични области и 5.000 албуми и ДВД-дискови со најразлични мултимедијални содржини.

Исто така, има и места за дружење на читателите, мултимедијален простор и галерија посветена на современата уметност. Покрај тоа, има и книжарница каде се продаваат книги.

Е. Д. | Црнобело