Фото-приказна: Гробишта на возови и заборав во близина на Будимпешта
Постојат моменти кога сакам да се тргнам настрана од туристичките атракции и да зачекорам на некое место, речиси заборавено од човекот. Место примамливо само за луѓето кои сакаат да ѕирнат во некоја поразлична перспектива од она што им е изложено пред очи.
Само што дознав за Red Star Train Graveyard, кој се наоѓа надвор од Будимпешта, веднаш решив да го посетам ова место на заборав, кое сведочи за историјата на возовите.
Ова огромно пространство било изградено во почеток на 20-ти век како место за поправка на возови, но денес само јужниот дел од двориштето е во употреба, додека сé останато е напуштено.
На огромно подрачје, обраснато со нескротлива вегетација се наоѓаат повеќе од сто локомотиви и вагони стари со години и години.
Некои се навистина стари и ретки призори, другите остатоци од возовите се од советскиот режим. Има и такви возови кои биле подготвени да се изложат во Музеј на возови во Будимпешта, но никогаш не го дочекале денот да бидат претставени пред светот.
Не знам колку е веродостоен податокот, но има гласини дека токму во некои од напуштените депоа се наоѓаат локомотиви кои ги транспортирале затворениците во Аушвиц. За жал, поради обезбедувањето кое парадираше со кучиња не успеав да се „дочепкам“ до сите објекти.
Ваков вид на прошетка, пропратена со адреналин случајно да не бидеш забележан од непожелни очи секогаш добро влијае врз мене. Не мора да си фанатик по возови за да го посетиш Red Star Train Graveyard, доволно е да имаш страст спрема историја и толку.
Во секој случај самата посета на овие гробишта на возови претставуваше едно интересно искуство, затоа што токму во напуштените простори се кријат најинтересните приказни.
Автор: Евгениј Хоуп | Црнобело
Би можело да ве интересира:
Препорачуваме
Најчитани неделава
