Rainbow Gathering - уникатни собири за сплотување со мајката природа

Во Македонија, и воопшто на Балканот, мистиката што ја нудеа егзотичниот Исток и западните њуејџ­филозофии речиси и да не постои, или е сосема маргинализирана.

Не знам колку од вас имаат слушнато за Rainbow Gathering, кое претставува привремена комуна, а се организира насекаде низ светот. На тешко пристапно место, некаде во природа се собираат стотина, па дури и илјадници луѓе од различни држави, кои еден на друг се обраќаат со „братe“ и „сестро“.

Оваа голема фамилија, како што се именуваат сите заедно е составена од луѓе со различни животни приказни и идентитети, секој уникатен на свој начин. Тоа се луѓе кои сакаат да побегнат од консумеризмот, капитализмот и масовните медиуми.

Rainbow Gathering е место каде можат да се сретнат поединци со долги несредени коси и разбушавени бради, луѓе со суканици, жени во шарени индијски сукњи, со стегнати гради и набрегнати брадавици, како и целосно голи, недоволно средени и влакнести мажи, жени и деца.

Првиот Rainbow Gathering, четиридневен собир во 1972 година се одржал во Колорадо, каде што во заднината на нивните верувања стоeле влијанија од движењето Харе Кришна, различни еврејски учења, искомбинирани со американски шамани и неопагани.

Додека истражував за историјатот на овие собири налетав на секакви толкувања и поимања на идејата. Најглавното со кое многумина се согласуваат е дека кога планетата Земја ќе биде опустошена, кога животните ќе почнат да умираат, ќе се појави надеж во форма на нова раса луѓе со разни бои, класи и верувања и оној кој длабоко ги почитува и применува нивните правила, со заедничка помош, ќе може опустошената земја повторно да ја обои зелена.

Во самиот епицентар на кампот се наоѓа голем огин што тлее цело време, а околу него се случуваат најинтересните настани. Присутните им ракоплескаат на жонглерите, им мавтаат на играчите со огнени палки, практикуваат суфистички танци и медитирааат.

Сите дојденци кампуваат, а шаторите им се така поставени што имаат увид на секој присутен. Оброците речиси им исклучиво вегетаријански и самиот настан претставува природна забава, без технологија, алкохол и дрога.

Овој настан не само што ќе ви овозможи голи да трчате низ шума со други хипици, туки и ќе ви отвори потполно нов светоглед.

Овој спиритуален настан на луѓето им овозможува да се реконектираат со мајка Природа и заедно со другите дојденци да ги надминат личните конфликти и да се воздигнат.

На Rainbow Gathering секој се грижи за секого, се молат за планетарен мир и хармонија во нивните срца. Овој необичен, но и мудар собир на присутните им овозможува да се сетат кои се и истовремено да дејствуваат на глобалната свест.

Автор: Евгениј Хоуп | Црнобело