„Бев во Белград, го посетив Земун и кулата Гардош - посведочив на уникатна убавина“

Во последните години често одев во Белград, но никако не успевав да одвојам време и да го посетам Земун. Но, на моето последно патување таму, бев решен да одвојам време за Земун. Тоа ми беше на врвот на приоритети и активности кои сакав да ги остварам.

Бев сместен на Карабурма, па како најсоодветен ден за посета на Земун  ја избрав сабота.

И покрај прогнозата од претходните денови дека ќе паѓа дожд, во текот на целиот ден не падна ниту една капка, а сонцето препекуваше цело попладне. Се качивме во градски автобус и по 40 минути стигнавме во општината Земун, на десниот брег од Дунав.

Веќе однапред имав испланирано што да правам, затоа што така ми е најлесно да раководам со времето.

Прво се спуштивме до кејот и покрај реката Дунав продолживме да одиме кон Гардош, имавме за пешачење 2 километри. Имаше многу луѓе, возеа велосипеди, трчаа, пешачеа, грицкајќи пуканки…

Сплав до сплав, ресторан до ресторан, тезги со палачинки, сладолед, крофни, играчки… Имаше од сè по нешто.

Ако сте љубители на театарска уметност, тогаш задолжително да изгледате некоја претстава во „Мадленијанум“, прва приватна опера и театарска компанија во Србија.

Не проверив што беше на репертоарот и дали воопшто имаше нешто тој ден, но си дадов ветување на наредно доаѓање да изгледам некоја претстава од моите пријатели од Белград.

Искрено, најмногу ѝ се радував на градската населба Гардош, која е во склоп на Земун.

Оваа ридско место со тесни улички, скриени од масовниот остаток на Белград, ти овозможува слободно да пешачиш на калдрма стара со децении. Целата околина, заедно со малите куќарки и карактеристична архитектура им годи на очите.

Кога најпосле ќе се искачиш на самиот врв од ридот, те чека кулата Гардош – еден од најпрепознатливите симболи на Земун.

На сите срдечно им ја препорачувам оваа точка, погледот што ќе се открие пред вас навистина ќе ви ги испразни мислите барем минута-две.

Ова здание е едно меѓу последните траги од Австроунгарското царство на територија на денешна Србија. Ако се качите на ова 36-метарска кула, ќе може да уживате со поглед од 360 степени и истовремено ќе ви стане омилена точка од која нема да сакате да се поместите.

Во секој случај овој културно-историски споменик сè повеќе и повеќе станува посетувана локација и ги тера посетителите постојано да се навраќаат тука.

Кога се спуштивме на кејот, решивме да се одмориме во сплавот „Гугутка“. Навистина интересно среден, кој позитивно ме изненади. Со пиво пред себе, си ги споделивме импресиите од изминатиот ден.

©CRNOBELO.com Забрането преземање и копирање. Крадењето на авторски текстови е казниво со закон.

Е. Х. | Црнобело